ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠵᠠᠰᠠᠭᠲᠤ ᠠᠷᠠᠳ ᠤᠨ ᠤᠯᠠᠮᠵᠢᠯᠠᠯᠲᠦ ᠤᠶᠤᠳᠠᠯ ᠬᠠᠳᠬᠤᠮᠠᠯ ᠤᠨ ᠨᠡᠷᠡᠰ ᠵᠢᠴᠢ ᠤᠶᠤᠬᠤ ᠠᠷᠭ᠎ᠠ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2020/8/4
 ᠨᠢᠭᠡ᠂ ᠤᠶᠤᠳᠠᠯ ᠤᠨ ᠨᠡᠷᠡᠰ ᠵᠢᠴᠢ ᠤᠶᠤᠬᠤ ᠠᠷᠭ᠎ᠠ     ︵ᠨᠢᠭᠡ︶ ᠲᠤᠭᠤᠴᠢᠶᠠᠷ — ᠲᠤᠭᠤᠴᠢᠶᠠᠷ ᠭᠡᠳᠡᠭ ᠨᠢ ᠮᠤᠩᠭᠤᠯ ᠭᠤᠳᠤᠯ ᠱᠠᠬᠠᠢ ᠶᠢᠨ ᠵᠤᠯᠤᠭ ᠲᠦᠷᠡᠢ  ᠶᠢ ᠤᠶᠤᠬᠤ ᠨᠢᠭᠡ ᠵᠤᠶᠢᠯ ᠤᠨ ᠤᠷᠠᠨ ᠤᠶᠤᠳᠠᠯ ᠪᠤᠯᠤᠨ᠎ᠠ᠃ ᠲᠤᠭᠤᠴᠢᠶᠠᠷ ᠢ ᠤᠶᠤᠬᠤ ᠳᠤ ᠳᠠᠩ ᠵᠡᠭᠦᠦ ᠳᠠᠩ ᠤᠳᠠᠰᠦ ᠪᠠᠷ ᠤᠶᠤᠬᠤ᠂ ᠵᠤᠯᠤᠭ ᠲᠦᠷᠡᠢ ᠶᠢᠨ ᠢᠶᠠᠨ ᠦᠩᠬᠡ ᠶᠢᠨ ︵ᠨᠢᠭᠤᠷ ᠳᠠᠯ᠎ᠠ︶ ᠳᠠᠯ᠎ᠠ ᠶᠢᠨ ᠪᠦᠰ ᠤᠨ ᠰᠢᠷᠬᠡᠭ ᠢ ᠲᠤᠭᠠᠯᠠᠵᠦ᠂ ᠨᠢᠭᠡ ᠨᠢᠬᠡ ᠵᠡᠬᠦᠦ ᠪᠠᠷ ᠨᠡᠪᠳᠡᠯᠤᠨ ᠨᠢᠲᠤᠯᠠᠨ ᠬᠠᠳᠬᠤᠵᠦ᠂ ᠦᠯᠢᠭᠡᠷ ᠵᠢᠷᠤᠭ ᠤᠨ ᠬᠡ ᠤᠭᠠᠯᠵᠠ ᠳᠠᠭᠠᠦ ᠤᠶᠤᠳᠠᠭ᠃ ᠤᠷᠠᠨ ᠰᠠᠶᠢᠬᠠᠨ ᠤᠶᠤᠭᠰᠠᠨ ᠲᠤᠭᠤᠴᠢᠶᠠᠷ ᠨᠢ ᠬᠡ ᠵᠢᠷᠤᠭ ᠨᠢ ᠵᠤᠷᠠᠶᠢᠵᠦ ᠬᠠᠷᠠᠭᠳᠠᠬᠤ ᠠᠴᠠ ᠪᠢᠰᠢ ᠤᠳᠠᠰᠦ ᠵᠡᠬᠦᠦ ᠶᠢᠨ ᠰᠤᠯᠠ ᠭᠠᠵᠠᠷ ᠦᠵᠡᠭᠳᠡᠬᠦ ᠦᠬᠡᠢ ᠪᠠᠶᠢᠳᠠᠭ᠃ ᠲᠤᠭᠤᠴᠢᠶᠠᠷ ᠤᠶᠤᠳᠠᠯ ᠤᠨ ᠰᠠᠶᠢᠨ ᠳᠠᠯ᠎ᠠ ᠨᠢ ᠤᠶᠤᠭᠰᠠᠨ ᠵᠢᠷᠤᠭ ᠴᠡᠪᠡᠷ ᠨᠠᠷᠢᠯᠢᠭ ᠬᠠᠷᠠᠭᠳᠠᠬᠤ ᠪᠦᠬᠡᠳ ᠭᠤᠳᠤᠯ ᠱᠠᠬᠠᠢ ᠶᠢᠨ ᠲᠦᠷᠡᠢ ᠵᠤᠯᠤᠭ ᠴᠢᠩᠭᠠᠷᠠᠨ ᠬᠠᠳᠠᠭᠤᠷᠠᠵᠦ ᠪᠠᠬᠢᠯᠢᠭ᠌ ᠪᠤᠯᠳᠠᠭ᠃ ᠡᠶᠢᠮᠦ ᠠᠴᠠ ᠲᠤᠭᠤᠴᠢᠶᠠᠷ ᠤᠶᠤᠳᠠᠯ ᠲᠠᠢ ᠭᠤᠳᠤᠯ ᠱᠠᠬᠠᠢ ᠶᠢ ᠦᠵᠡᠬᠦ ᠳᠤ ᠭᠤᠶᠤ᠂ ᠡᠳ᠋ᠯᠡᠬᠦ ᠳᠤ ᠪᠠᠬᠢ ᠪᠠᠶᠢᠳᠠᠭ ᠤᠨᠴᠠᠯᠢᠭ ᠲᠠᠢ᠃     ︵ᠬᠤᠶᠠᠷ︶ ᠰᠢᠷᠢᠮᠡᠯ — ᠰᠢᠷᠢᠮᠡᠯ ᠭᠡᠳᠡᠭ ᠤᠶᠤᠳᠠᠯ ᠨᠢ ᠡᠳ᠋ᠯᠡᠯ ᠪᠠᠷᠠᠭ᠎ᠠ ᠶᠢ ᠬᠠᠳᠠᠭᠤ ᠴᠢᠩᠭ᠎ᠠ᠂ ᠪᠠᠬᠢ ᠪᠤᠯᠭᠠᠳᠠᠭ ᠤᠶᠤᠳᠠᠯ ᠪᠤᠯᠤᠨ᠎ᠠ᠃ ᠰᠢᠷᠢᠮᠡᠯ ᠢ ᠭᠤᠤᠯᠳᠠᠭᠤ ᠭᠤᠳᠤᠯ ᠱᠠᠬᠠᠢ᠂ ᠢᠰᠡᠭᠡᠢ ᠰᠢᠷᠢᠳᠡᠭ ᠳᠡᠭᠡᠷ᠎ᠡ ᠬᠡᠷᠡᠭᠯᠡᠳᠡᠭ᠃ ᠰᠢᠷᠢᠮᠡᠯ ᠢ ᠵᠠᠰᠠᠭᠲᠤ ᠤᠶᠤᠳᠠᠯ ᠳᠤ ᠬᠡ ᠤᠭᠠᠯᠵᠠ ᠪᠠ ᠰᠢᠷᠢᠬᠦ ᠠᠷᠭ᠎ᠠ ᠪᠠᠷ ᠨᠢ ᠲᠦᠷᠪᠡᠨ ᠵᠤᠶᠢᠯ  ᠳᠤ ᠢᠯᠭᠠᠨ᠎ᠠ᠄1᠂ ᠳᠠᠩ ᠰᠢᠷᠢᠮᠡᠯ — ᠳᠠᠩ ᠵᠡᠬᠦᠦ ᠤᠳᠠᠰᠦ ᠪᠠ ᠳᠠᠪᠬᠤᠷ ᠵᠡᠭᠦᠦ ᠤᠳᠠᠰᠦ ᠪᠠᠷ ᠵᠤᠯᠤᠭ ᠲᠦᠷᠡᠢ ᠳᠡᠭᠡᠷ᠎ᠡ ᠪᠠᠨ ᠡᠮᠬᠢ ᠴᠡᠭᠴᠡᠳᠡᠢ ᠲᠦᠷᠪᠡᠯᠵᠢᠯᠡᠵᠦ ᠬᠠᠳᠬᠤᠬᠤ ᠶᠢ ᠬᠡᠯᠡᠨ᠎ᠡ᠃2᠂ ᠱᠠᠭᠠᠵᠠᠭᠠᠢ ᠶᠢᠨ ᠬᠦᠯ ᠤᠨ ᠰᠢᠷᠢᠮᠡᠯ — ᠱᠠᠭᠠᠵᠠᠭᠠᠢ ᠶᠢᠨ ᠬᠦᠯ ᠤᠨ ᠡᠮᠦᠨ᠎ᠡ ᠳᠠᠯ᠎ᠠ ᠳᠤᠨᠢ ᠭᠤᠷᠪᠠᠨ ᠰᠠᠯᠠᠭ᠎ᠠ ᠬᠢᠮᠤᠰᠦ ᠶᠢᠨ ᠮᠦᠷ ᠢ ᠳᠠᠭᠤᠷᠢᠶᠠᠵᠦ ᠤᠶᠤᠭᠰᠠᠨ ᠰᠢᠷᠢᠮᠡᠯ ᠢ ᠱᠠᠭᠠᠵᠠᠭᠠᠢ ᠶᠢᠨ ᠬᠦᠯ ᠤᠨ ᠰᠢᠷᠢᠮᠡᠯ ᠭᠡᠳᠡᠭ᠃ ᠲᠤᠰ ᠰᠢᠷᠢᠮᠡᠯ ᠢ ᠰᠢᠷᠢᠬᠦ ᠳᠤ ᠳᠠᠩ᠂ ᠳᠠᠪᠬᠤᠷ ᠵᠡᠭᠦᠦ ᠳᠠᠩ ᠤᠳᠠᠰᠦ ᠪᠠᠷ ᠭᠤᠷᠪᠠᠨ ᠰᠠᠯᠠᠭ᠎ᠠ ᠪᠠᠷ ᠬᠠᠳᠬᠤᠵᠦ ᠤᠶᠤᠨ᠎ᠠ᠃3᠂ ᠰᠤᠷᠢᠰᠤᠨ ᠬᠤᠸᠠᠷ ︵ᠭᠤᠭᠤᠳ ᠤᠨ ᠬᠤᠸᠠᠷ︶ ᠤᠨ ᠰᠢᠷᠢᠮᠡᠯ — ᠬᠡᠭᠡᠷ᠎ᠡ ᠶᠢᠨ ᠭᠤᠭᠤᠳ ᠤᠨ ᠬᠤᠸᠠᠷ  ᠢᠶᠠᠷ ᠬᠦᠮᠦᠰ ᠰᠤᠷᠢᠰᠦ ᠭᠡᠳᠡᠭ ᠬᠤᠯᠢᠰᠢᠨ ᠢᠳᠡᠭᠡᠨ ᠬᠢᠳᠡᠭ ᠲᠤᠯᠠ ᠪᠠᠰᠠ ᠰᠣᠷᠢᠰᠣᠨ ᠬᠤᠸᠠᠷ ᠭᠡᠳᠡᠭ᠂ ᠰᠤᠷᠢᠰᠤᠨ ᠬᠤᠸᠠᠷ ᠨᠢ ᠦᠷᠡᠯᠡᠵᠦ ᠪᠤᠯᠪᠠᠰᠤᠷᠠᠪᠠᠯ ᠵᠢᠵᠢᠭ ᠵᠢᠵᠢᠭ ᠲᠦᠷᠪᠡᠯᠵᠢᠨ ᠤᠷᠤᠢ ᠲᠠᠢ ᠲᠤᠯᠤᠭᠠᠶᠢᠯᠠᠳᠠᠭ᠃ ᠡᠨᠡ ᠬᠦ ᠵᠢᠵᠢᠭ ᠲᠦᠷᠪᠡᠯᠵᠢᠨ ᠲᠦᠷᠦᠭᠦᠦ ᠶᠢ ᠳᠠᠭᠤᠷᠢᠶᠠᠵᠦ ᠬᠠᠳᠬᠤᠭᠰᠠᠨ ᠰᠢᠷᠢᠮᠡᠯ ᠢ ᠰᠤᠷᠢᠰᠤᠨ ᠬᠤᠸᠠᠷ ᠤᠨ ᠰᠢᠷᠢᠮᠡᠯ ᠬᠡᠵᠦ ᠬᠡᠯᠡᠳᠡᠭ᠃ ᠲᠤᠰ ᠤᠶᠤᠳᠠᠯ ᠢ ᠪᠠᠰᠠ ᠳᠠᠩ ᠵᠡᠬᠦᠦ᠂ ᠳᠠᠩ ᠳᠠᠪᠬᠤᠷ ᠤᠳᠠᠰᠦ ᠪᠠᠷ ᠲᠦᠷᠪᠡᠯᠵᠢᠨ ᠬᠤᠸᠠᠷᠯᠠᠵᠦ ᠰᠢᠷᠢᠵᠦ ᠤᠶᠤᠳᠠᠭ᠃4᠂ ᠶᠢᠰᠦᠨ ᠵᠡᠭᠦᠦ ᠶᠢᠨ ᠰᠢᠷᠢᠮᠡᠯ — ᠳᠠᠩ ᠵᠡᠬᠦᠦ ᠳᠠᠩ ᠤᠳᠠᠰᠦ ᠪᠠᠷ ᠶᠢᠰᠦ ᠶᠢᠰᠦ ᠪᠠᠷ ᠪᠦᠯᠦᠭᠯᠡᠨ ᠬᠠᠳᠬᠤᠵᠦ ᠰᠢᠷᠢᠵᠦ ᠤᠶᠤᠬᠤ ᠶᠢ ᠬᠡᠯᠡᠨ᠎ᠡ᠃ ᠰᠢᠷᠢᠮᠡᠯ ᠤᠶᠤᠳᠠᠯ ᠤᠨ ᠳᠠᠪᠠᠭᠤᠯᠢᠭ ᠳᠠᠯ᠎ᠠ ᠨᠢ ᠤᠶᠤᠳᠠᠯᠴᠢᠨ ᠤ ᠤᠷᠠᠨ ᠪᠤᠶᠤ ᠰᠠᠯᠠᠩ ᠲᠠᠢ ᠳᠡᠮᠡᠢ ᠬᠤᠯᠪᠤᠭᠳᠠᠬᠤ ᠦᠬᠡᠢ᠂ ᠦᠯᠢᠭᠡᠷ ᠬᠡ ᠳᠡᠮᠡᠢ ᠬᠡᠷᠡᠭᠰᠡᠬᠦ ᠦᠬᠡᠢ᠂ ᠤᠶᠤᠬᠤ ᠳᠤ ᠲᠦᠬᠦᠮ᠂ ᠴᠠᠭ ᠳᠤ ᠠᠷᠪᠢᠲᠠᠢ᠃ ᠰᠢᠷᠢᠮᠡᠯ ᠤᠶᠤᠳᠠᠯ ᠲᠠᠢ ᠭᠤᠳᠤᠯ ᠱᠠᠬᠠᠢ᠂ ᠢᠰᠡᠭᠡᠢ ᠰᠢᠷᠢᠳᠡᠭ ᠨᠢ ᠡᠮᠦᠰᠴᠦ ᠡᠳ᠋ᠯᠡᠬᠦ ᠳᠤ ᠲᠤᠩ ᠪᠦᠬᠡ᠂ ᠠᠵᠢᠯ ᠬᠦᠳᠡᠯᠮᠤᠷᠢ ᠶᠢᠨ ᠬᠠᠳᠠᠭᠤ ᠬᠠᠯᠠ ᠶᠢ ᠰᠠᠶᠢᠨ ᠳᠠᠭᠠᠭᠠᠳᠠᠭ᠃     ︵ᠭᠤᠷᠪᠠ︶ ᠰᠢᠭᠯᠠᠭᠠᠷ — ᠰᠢᠭᠯᠠᠭᠠᠷ ᠨᠢ ᠲᠤᠭᠤᠴᠢᠶᠠᠷ ᠢ ᠪᠤᠳᠤᠪᠠᠯ ᠨᠡᠩ ᠲᠦᠭᠦᠮ ᠰᠢᠭ ᠤᠶᠤᠳᠠᠯ ᠪᠤᠯᠤᠨ᠎ᠠ᠃ ᠰᠢᠭᠯᠠᠬᠤ ᠪᠤᠯ ᠳᠠᠩ ᠪᠤᠶᠤ ᠳᠠᠪᠬᠤᠷ ᠤᠳᠠᠰᠦ ᠰᠦᠪᠡᠯᠡᠵᠦ ᠵᠢᠷᠤᠮᠡᠯ ᠬᠡ ᠶᠢᠨ ᠳᠠᠭᠠᠦ ᠡᠮᠦᠨ᠎ᠡ ᠬᠠᠳᠬᠤᠭᠰᠠᠨ ᠵᠡᠬᠦᠦ ᠶᠢᠨ ᠢᠶᠠᠨ ᠠᠷᠦ ︵ᠰᠡᠭᠦᠯ︶ ᠳᠡᠭᠡᠷ᠎ᠡ ᠤᠬᠤᠷᠢᠵᠦ ᠬᠠᠳᠬᠤᠨ ᠳᠠᠬᠢᠵᠦ ᠡᠮᠦᠨᠡᠰᠢ ᠤᠷᠤᠭᠰᠢᠯᠠᠵᠦ ᠰᠡᠯᠪᠢᠵᠦ ᠤᠶᠤᠬᠤ ᠠᠷᠭ᠎ᠠ ᠪᠤᠯᠤᠨ᠎ᠠ᠃ ᠲᠦᠬᠦᠮ ᠢᠶᠠᠷ ᠬᠡᠯᠡᠪᠡᠯ ᠰᠢᠭᠯᠠᠬᠤ ᠪᠤᠯ ᠨᠢᠭᠡ ᠨᠦᠬᠡ ᠪᠠᠷ ᠪᠤᠴᠠᠭᠠᠨ ᠬᠦᠭᠡᠭᠡᠵᠦ᠂ ᠵᠢᠭᠲᠡ ᠵᠠᠶᠢᠲᠠᠢ ᠠᠯᠭᠠᠰᠠᠯ ᠦᠬᠡᠢ ᠤᠶᠤᠬᠤ ᠶᠢ ᠬᠡᠯᠡᠨ᠎ᠡ᠃ ᠰᠢᠭᠯᠠᠭᠠᠷ ᠤᠶᠤᠳᠠᠯ ᠮᠦᠨ ᠴᠦ ᠲᠦᠬᠦᠮ ᠬᠤᠷᠲᠤᠨ᠂ ᠪᠠᠬᠢᠯᠢᠭ᠌ ᠵᠡᠷᠭᠡ ᠳᠠᠪᠠᠭᠤ ᠳᠠᠯ᠎ᠠ ᠲᠠᠢ ᠲᠤᠯᠠ ᠭᠤᠲᠤᠯ ᠱᠠᠬᠠᠢ ᠶᠢᠨ ᠲᠦᠷᠡᠢ ᠵᠤᠯᠤᠭ ᠳᠡᠭᠡᠷ᠎ᠡ ᠦᠷᠬᠦᠯᠵᠢ ᠤᠶᠤᠳᠠᠭ ᠪᠦᠬᠡᠳ ᠬᠠᠪᠤᠷ ᠵᠤᠨ ᠨᠠᠮᠤᠷ ᠤᠨ ᠬᠠᠨᠳᠠᠭᠠᠰᠦ ᠦᠮᠦᠲᠦ᠂ ᠴᠡᠮᠴᠡ ᠶᠢᠨ ᠤᠶᠤᠳᠠᠯ ᠳᠡᠭᠡᠷ᠎ᠡ ᠴᠦ ᠦᠷᠬᠦᠯᠵᠢ ᠬᠡᠷᠡᠭᠯᠡᠳᠡᠭ ᠤᠶᠤᠳᠠᠯ ᠤᠨ ᠨᠢᠭᠡ ᠪᠤᠯᠤᠨ᠎ᠠ᠃     ︵ᠲᠦᠷᠪᠡ︶ ᠤᠷᠢᠶᠠᠮᠠᠯ ︵ᠤᠷᠢᠶᠠᠬᠤ︶ — ᠤᠷᠠᠯᠠᠯ ᠭᠤᠶᠤᠯᠠᠯ ᠢ ᠬᠤᠤᠰᠯᠠᠭᠤᠯᠤᠭᠰᠠᠨ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠶᠢᠨ ᠭᠤᠲᠤᠯ ᠱᠠᠬᠠᠢ ᠳᠡᠭᠡᠷ᠎ᠡ ᠤᠷᠠᠯᠠᠨ ᠤᠶᠤᠳᠠᠭ ᠤᠯᠠᠮᠵᠢᠯᠠᠯᠲᠤ ᠤᠷ᠎ᠠ ᠮᠡᠷᠭᠡᠵᠢᠯ ᠤᠨ ᠤᠶᠢᠯᠠ ᠤᠶᠤᠳᠠᠯ  ᠤᠨ ᠨᠢᠭᠡ ᠲᠦᠷᠦᠯ ᠪᠤᠯᠤᠨ᠎ᠠ᠃ ᠤᠷᠢᠶᠠᠮᠠᠯ ᠤᠶᠤᠳᠠᠯ ᠤᠨ ᠪᠤᠰᠤᠳ ᠤᠶᠤᠳᠠᠯ ᠠᠴᠠ ᠢᠯᠭᠠᠭᠳᠠᠬᠤ ᠤᠨᠴᠠᠭᠠᠢ ᠳᠠᠯ᠎ᠠ ᠨᠢ ᠬᠤᠶᠠᠷ ᠵᠡᠭᠦᠦ ᠬᠤᠶᠠᠷ ᠤᠳᠠᠰᠦ ᠪᠠᠷ ᠰᠢᠭᠯᠠᠬᠤ ᠪᠠ ᠬᠤᠶᠠᠷ ᠤᠶᠢᠯᠠ ᠶᠢ ᠨᠢᠭᠡ ᠳᠡᠭᠡᠷ᠎ᠡ ᠤᠶᠠᠯᠳᠤᠭᠤᠯᠤᠨ ᠤᠶᠤᠬᠤ ᠶᠢ ᠬᠡᠯᠡᠨ᠎ᠡ᠃ ᠤᠷᠢᠶᠠᠮᠠᠯ ᠢ ᠲᠦᠷᠪᠡᠨ ᠲᠦᠷᠦᠯ ᠳᠤ ᠬᠤᠪᠢᠶᠠᠨ᠎ᠠ᠄  1᠂ ᠳᠠᠩ ᠤᠷᠢᠶᠠᠮᠠᠯ — ᠳᠠᠩ ᠤᠷᠢᠶᠠᠮᠠᠯ ᠭᠡᠳᠡᠭ ᠨᠢ ᠳᠠᠩ᠂ ᠳᠠᠪᠬᠤᠷ ᠤᠳᠠᠰᠦ ᠰᠦᠪᠡᠯᠡᠭᠰᠡᠨ ᠵᠡᠬᠦᠦ ᠣᠳᠠᠰᠦ  ᠪᠠᠨ ᠲᠦᠷᠡᠢ ᠵᠤᠯᠤᠭ ᠤᠨ ᠠᠷᠦ ᠳᠠᠯ᠎ᠠ ᠠᠴᠠ ᠦᠩᠬᠡᠨ ᠳᠠᠯ᠎ᠠ ᠦᠬᠡᠳᠡ ᠬᠠᠳᠬᠤᠵᠦ ᠭᠠᠷᠭᠠᠨ ᠵᠡᠬᠦᠦ ᠶᠢᠨ ᠦᠵᠦᠭᠦᠷ ᠲᠤ ᠨᠦᠬᠦᠭᠡ ᠵᠡᠬᠦᠦ ᠶᠢᠨ ᠡᠷᠴᠢᠮᠯᠡᠭᠰᠡᠨ ᠤᠳᠠᠰᠦ ᠪᠠᠷ ᠤᠷᠢᠶᠠᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠲᠦᠷᠦᠬᠦᠨ ᠤ ᠵᠡᠬᠦᠦ  ᠪᠠᠷ ᠢᠶᠠᠨ ᠳᠠᠷᠤᠵᠦ ᠰᠢᠭᠯᠠᠬᠤ ᠠᠷᠭ᠎ᠠ ᠪᠠᠷ ᠣᠷᠤᠭᠰᠢᠯᠠᠨ ᠤᠶᠤᠬᠤ ᠶᠢ ᠬᠡᠯᠡᠨ᠎ᠡ᠃ ᠤᠷᠢᠶᠠᠮᠠᠯ ᠨᠢ ᠰᠢᠭᠯᠠᠬᠤ ᠪᠠ ᠤᠷᠢᠶᠠᠬᠤ ᠬᠤᠶᠠᠷ ᠢ ᠨᠢᠭᠡᠳᠭᠡᠭᠰᠡᠨ ᠤᠶᠤᠳᠠᠯ ᠶᠤᠮ᠃2᠂ ᠳᠠᠪᠬᠤᠷ ᠤᠷᠢᠶᠠᠮᠠᠯ — ᠳᠠᠪᠬᠤᠷ ᠤᠷᠢᠶ᠋ᠮᠠᠯ ᠭᠡᠳᠡᠭ ᠨᠢ ᠤᠶᠤᠵᠦ ᠤᠷᠢᠶᠠᠬᠤ ᠶᠠᠪᠤᠴᠠ ᠨᠢ ᠳᠠᠩ ᠤᠷᠢᠶᠠᠮᠠᠯ  ᠲᠠᠢ ᠦᠨᠳᠦᠰᠦᠨ ᠳᠡᠭᠡᠨ ᠠᠳᠠᠯᠢ ᠪᠠᠶᠢᠵᠦ᠂ ᠵᠦᠪᠬᠡᠨ ᠳᠠᠷᠤᠵᠦ ᠰᠢᠭᠯᠠᠬᠤ ᠵᠡᠬᠦᠦ ᠪᠠᠨ ᠬᠤᠶᠠᠷ ᠮᠦᠷ ᠢᠶᠠᠷ ᠵᠡᠷᠭᠡᠴᠡᠭᠦᠯᠦᠨ ᠬᠠᠳᠬᠤᠵᠦ᠂ ᠡᠷᠴᠢᠮᠯᠡᠭᠰᠡᠨ ᠤᠳᠠᠰᠦ ᠪᠠᠨ ᠬᠤᠶᠠᠷ ᠨᠢᠷᠤᠭᠤ ᠶᠢ ᠵᠡᠷᠭᠡᠴᠡᠭᠦᠯᠦᠨ ᠤᠷᠢᠶᠠᠵᠦ ᠳᠠᠷᠤᠵᠢ ᠰᠢᠭᠯᠠᠪᠠᠯ ᠬᠡᠳᠡᠰᠦ ᠨᠢ ᠬᠤᠶᠠᠷ ᠨᠢᠷᠤᠭᠤᠨ ᠤ ᠬᠤᠶᠠᠷ ᠲᠠᠯ᠎ᠠ ᠳᠤᠨᠢ ᠭᠠᠷᠴᠦ ᠤᠷᠢᠶᠠᠮᠠᠯ ᠦᠷᠬᠡᠨ ᠪᠤᠯᠵᠦ ᠬᠠᠷᠠᠭᠳᠠᠳᠠᠭ᠃3᠂ ᠰᠤᠯᠪᠢᠴᠠᠭᠤᠯᠤᠨ ᠤᠷᠢᠶᠠᠬᠤ — ᠰᠤᠯᠪᠢᠴᠠᠭᠤᠯᠤᠨ ᠤᠷᠢᠶᠠᠬᠤ ᠨᠢ ᠳᠠᠪᠬᠤᠷ ᠤᠷᠢᠶᠠᠮᠠᠯ ᠲᠠᠢ ᠦᠨᠳᠦᠰᠦᠨ  ᠳᠡᠭᠡᠨ ᠠᠳᠠᠯᠢ ᠪᠤᠯᠪᠠᠴᠦ ᠰᠢᠭᠯᠠᠬᠤ ᠵᠡᠭᠦᠦ ᠪᠠᠨ ᠵᠡᠷᠭᠡᠴᠡᠭᠦᠯᠦᠨ ᠬᠠᠳᠬᠤᠵᠦ᠂ ᠡᠷᠴᠢᠮᠯᠡᠭᠰᠡᠨ ᠤᠳᠠᠰᠦ ᠪᠠᠨ ᠰᠤᠯᠪᠢᠴᠠᠭᠤᠯᠤᠨ ᠰᠤᠯᠢᠵᠦ ᠤᠷᠢᠶᠠᠨ ᠳᠠᠷᠤᠵᠦ ᠰᠢᠭᠯᠠᠬᠤ ᠶᠢ ᠬᠡᠯᠡᠨ᠎ᠡ᠃ ᠡᠨᠡ ᠬᠦ ᠤᠷᠢᠶᠠᠮᠠᠯ ᠨᠢ ᠪᠠᠰᠠ ᠨᠢᠭᠡ ᠦᠬᠡᠷ᠎ᠡ ᠬᠡᠯᠪᠡᠷᠢ ᠪᠠᠷ ᠦᠵᠡᠭᠳᠡᠳᠡᠭ᠃4᠂ ᠭᠤᠷᠪᠠᠨ ᠵᠡᠬᠦᠦ ᠪᠠᠷ ᠲᠤᠭᠤᠴᠢᠵᠦ ᠤᠷᠢᠶᠠᠬᠤ — ᠤᠷᠢᠶᠠᠮᠠᠯ ᠨᠢ ᠭᠤᠷᠪᠠᠨ ᠵᠡᠬᠦᠦ ᠤᠷᠢᠶᠠᠪᠠᠯ ᠭᠤᠷᠪᠠᠨ ᠵᠡᠬᠦᠦ ᠬᠢᠷᠤᠭᠡᠨ ᠰᠢᠲᠦ ᠭᠠᠷᠭᠠᠨ ᠭᠤᠭᠴᠤᠭ᠎ᠠ ᠠᠯᠳᠠᠯᠠᠨ ᠤᠶᠤᠵᠦ᠂ ᠤᠷᠢᠶᠠᠮᠠᠯ ᠪᠠ ᠲᠤᠭᠤᠴᠢᠶᠠᠷ ᠢ ᠵᠠᠯᠭᠠᠵᠦ ᠤᠷᠠᠯᠠᠬᠤ ᠶᠢ ᠬᠡᠯᠡᠨ᠎ᠡ᠃ ᠡᠨᠡ ᠤᠶᠤᠳᠠᠯ ᠨᠢ ᠬᠤᠷᠲᠤᠨ ᠮᠦᠷᠳᠡᠭᠡᠨ ᠤᠳᠠᠰᠦᠨ ᠳᠤ ᠭᠠᠮᠳᠠᠢ ᠪᠠᠶᠢᠵᠦ᠂ ᠦᠵᠡᠬᠦ  ᠳᠤ ᠪᠠᠰᠠ ᠭᠤᠶᠤᠮᠰᠤᠭ ᠬᠠᠷᠠᠭᠳᠠᠳᠠᠭ᠃ ᠤᠷᠢᠢᠶᠠᠮᠠᠯ ᠤᠶᠤᠳᠠᠯ ᠤᠷᠠᠯᠠᠯ ᠤᠨ ᠳᠠᠪᠠᠭᠤᠯᠢᠭ ᠲᠠᠯ᠎ᠠ ᠨᠢ ᠦᠵᠡᠮᠤᠷᠢ ᠶᠢᠨ ᠲᠠᠯ᠎ᠠ ᠪᠠᠷ ᠭᠤᠶᠤ᠂ ᠤᠷ᠎ᠠ ᠮᠡᠷᠭᠡᠵᠢᠯ ᠦᠨᠳᠦᠷ᠂ ᠭᠡᠳᠡᠯ᠎ᠡ ᠪᠦᠬᠡ ᠶᠢᠨ ᠳᠠᠯ᠎ᠠ ᠪᠠᠷ ᠲᠤᠭᠤᠴᠢᠶᠠᠷ᠂ ᠰᠢᠭᠯᠠᠭᠠᠷ᠂ ᠰᠢᠷᠢᠮᠡᠯ ᠳᠤ ᠬᠦᠷᠬᠦ ᠦᠬᠡᠢ ᠪᠠᠶᠢᠳᠠᠭ᠃ ᠤᠷᠢᠶᠠᠮᠠᠯ ᠢ ᠭᠤᠤᠯᠳᠠᠭᠤ ᠭᠤᠳᠤᠯ ᠱᠠᠬᠠᠢ ᠶᠢᠨ ᠵᠤᠯᠤᠭ ᠳᠡᠭᠡᠷ᠎ᠡ ᠤᠷᠠᠯᠠᠳᠠᠭ ᠪᠦᠬᠡᠳ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠶᠢᠨ ᠬᠢ  ᠶᠢ ᠤᠳᠠᠰᠤᠨ ᠤ ᠦᠩᠬᠡ ᠪᠠᠷ ᠢᠯᠭᠠᠵᠦ ᠤᠶᠤᠳᠠᠭ᠃ ᠡᠷᠡᠭᠲᠡᠢ ᠬᠦᠮᠦᠨ ᠤ ᠭᠤᠳᠤᠯ ᠢ ᠬᠠᠷ᠎ᠠ᠂ ᠬᠦᠬᠡ᠂ ᠨᠤᠭᠤᠭᠠᠨ᠂ ᠴᠡᠩᠭᠡᠷ ᠢᠶᠠᠷ ᠤᠷᠢᠶᠠᠵᠦ᠂ ᠡᠮᠡᠭᠲᠡᠢ ᠬᠦᠮᠦᠨ ᠤ ᠬᠢ ᠶᠢ ᠤᠯᠠᠭᠠᠨ᠂ ᠨᠤᠭᠤᠭᠠᠨ᠂ ᠶᠠᠭᠠᠨ᠂ ᠬᠤᠨᠳᠠᠨ ᠦᠩᠭᠡ ᠶᠢᠨ ᠤᠳᠠᠰᠦ ᠪᠠᠷ ᠤᠶᠤᠳᠠᠭ᠃     ︵ᠲᠠᠪᠤ︶ ᠬᠠᠳᠬᠤᠮᠠᠯ — ᠬᠠᠳᠬᠤᠮᠠᠯ ᠨᠢ ᠠᠮᠢᠲᠤ ᠲᠦᠷᠰᠦᠯᠢᠭ ᠢᠶᠠᠷ ᠠᠭᠤᠯᠠ ᠤᠰᠤ᠂ ᠤᠷᠭᠤᠮᠠᠯ ᠪᠤᠳᠠᠰ᠂ ᠠᠮᠢᠲᠠᠨ ᠭᠤᠤᠯᠳᠠᠨ ᠤ ᠲᠦᠷᠰᠦ ᠶᠢ ᠤᠷᠠᠯᠠᠨ ᠬᠠᠳᠬᠤᠨ ᠤᠶᠤᠳᠠᠭ ᠤᠯᠠᠮᠵᠢᠯᠠᠯᠲᠤ ᠤᠷ᠎ᠠ ᠮᠡᠷᠭᠡᠵᠢᠯ ᠪᠤᠯᠤᠨ᠎ᠠ᠃ ᠬᠠᠳᠬᠤᠮᠠᠯ ᠨᠢ ᠭᠤᠳᠤᠯ ᠱᠠᠬᠠᠢ᠂ ᠳᠡᠪᠡᠯ ᠲᠡᠷᠯᠢᠭ᠂ ᠤᠤᠵᠢ ᠴᠤᠪᠠ᠂ ᠳᠡᠷ᠎ᠡ᠂ ᠮᠠᠯᠠᠭᠠᠢ ᠴᠢᠬᠢᠪᠴᠢ᠂ ᠤᠭᠤᠳᠠ ᠬᠠᠪᠳᠠᠭ᠎ᠠ᠂ ᠵᠡᠬᠦᠪᠴᠢ᠂ ᠳᠡᠯᠢᠩ ᠴᠢᠶᠠᠨᠳᠠᠰᠠ ᠵᠡᠷᠭᠡ ᠬᠤᠪᠴᠠᠰᠦ ᠭᠤᠳᠤᠯ ᠡᠳ᠋ᠯᠡᠯ ᠵᠠᠰᠠᠯ ᠤᠨ ᠳᠡᠭᠡᠷ᠎ᠡ ᠤᠷᠠᠯᠠᠨ ᠬᠠᠳᠬᠤᠳᠠᠭ ᠤᠶᠤᠳᠠᠯ ᠪᠤᠯᠤᠨ᠎ᠠ᠃ ᠲᠤᠷᠭᠠᠨ ᠤᠳᠠᠰᠦ ᠨᠢ ᠠᠷᠪᠠᠨ ᠬᠤᠶᠠᠷ ᠠᠴᠠ ᠬᠤᠷᠢᠨ ᠲᠦᠷᠪᠡᠨ ᠦᠩᠭᠡ ᠪᠠᠶᠢᠵᠦ᠂ ᠬᠠᠳᠬᠤᠮᠠᠯ ᠤᠶᠤᠳᠠᠯ ᠨᠢ ᠲᠠᠪᠤᠨ ᠵᠤᠶᠢᠯ ᠤᠨ ᠠᠷᠭ᠎ᠠ ᠪᠠᠷ ᠬᠠᠳᠬᠤᠳᠠᠭ ᠶᠤᠮ᠃1᠂ ᠳᠠᠩ ᠬᠠᠳᠬᠤᠮᠠᠯ — ᠤᠷᠠᠯᠠᠬᠤ ᠵᠢᠷᠤᠭ ᠦᠯᠢᠭᠡᠷ ᠤᠨ ᠠᠯᠢ ᠨᠢᠭᠡ ᠬᠡᠰᠡᠭ ᠢ ᠨᠢᠭᠡ ᠯᠡ ᠦᠩᠬᠡ ᠶᠢᠨ ᠤᠳᠠᠰᠦ ᠪᠠᠷ ᠬᠠᠳᠬᠤᠵᠦ ᠤᠷᠠᠯᠠᠬᠤ ᠶᠢ ᠬᠡᠯᠡᠳᠡᠭ᠃ ᠵᠢᠱᠢᠶᠡᠯᠡᠪᠡᠯ᠄ ᠨᠢᠭᠡ ᠵᠢᠮᠢᠰ᠂ ᠨᠢᠭᠡ ᠬᠦᠢᠰ ᠴᠡᠴᠡᠭ᠂ ᠴᠡᠴᠡᠭ ᠤᠨ ᠦᠷ᠎ᠡ᠂ ᠡᠰᠢ᠂ ᠨᠠᠪᠴᠢ ᠶᠢ ᠲᠤᠰ ᠪᠦᠷᠢ ᠨᠢᠭᠡ ᠯᠡ ᠴᠤᠯ ᠦᠩᠬᠡ ᠪᠠᠷ ᠬᠠᠳᠬᠤᠵᠦ ᠭᠠᠷᠭᠠᠬᠤ ᠶᠢ ᠬᠡᠯᠡᠨ᠎ᠡ᠃2᠂ ᠰᠠᠮᠨᠠᠵᠦ ᠬᠠᠳᠬᠤᠬᠤ — ᠦᠯᠢᠭᠡᠷ ᠵᠢᠷᠤᠭ ᠤᠨ ᠨᠢᠭᠡ ᠬᠡᠰᠡᠭ ᠢ ᠬᠠᠳᠬᠤᠬᠤ ᠳᠠᠭᠠᠨ ᠬᠤᠶᠠᠷ ᠪᠤᠶᠤ ᠭᠤᠷᠪᠠ ᠠᠴᠠ ᠳᠡᠭᠡᠭᠰᠢ ᠦᠩᠭᠡ ᠶᠢᠨ ᠲᠤᠷᠭᠠᠨ ᠤᠳᠠᠰᠦ ᠪᠠᠷ ᠦᠩᠬᠡ ᠬᠤᠯᠢᠯᠳᠤᠭᠤᠯᠤᠨ ᠰᠠᠮᠨᠠᠵᠦ ᠠᠯᠠᠭᠯᠠᠨ ᠤᠶᠤᠬᠤ ᠠᠷᠭ᠎ᠠ ᠶᠢ ᠬᠡᠯᠡᠳᠡᠭ᠃ ᠢᠩᠬᠢᠪᠡᠯ ᠴᠡᠴᠡᠭ ᠨᠠᠪᠴᠢ ᠶᠢᠨ ᠦᠩᠭᠡ ᠪᠡᠶ᠎ᠡ ᠨᠢ ᠢᠯᠭᠠᠷᠠᠨ ᠲᠤᠶᠠᠭᠠᠷᠠᠵᠦ ᠭᠤᠶᠤ ᠬᠠᠷᠠᠭᠳᠠᠳᠠᠭ ᠶᠤᠮ᠃3᠂ ᠳᠡᠭᠳᠡᠷᠯᠡᠵᠦ ︵ᠬᠠᠮᠵᠢᠭᠤᠯᠵᠦ︶ ᠬᠳᠬᠤᠬᠤ — ᠠᠮᠢᠳᠠᠨ ᠭᠤᠤᠯᠳᠠᠨ ᠪᠤᠯᠤᠨ ᠴᠡᠴᠡᠭ ᠮᠤᠲᠤ ᠶᠢᠨ ᠪᠦᠬᠦ ᠪᠡᠶ᠎ᠡ ᠶᠢ ᠬᠡᠳᠦᠨ ᠦᠩᠭᠡ ᠶᠢᠨ ᠲᠤᠷᠭᠠᠨ ᠤᠳᠠᠰᠦ ᠪᠠᠷ ᠬᠦᠨ ᠠᠴᠠ ᠬᠦᠢᠬᠡᠨ ᠵᠦᠭ ᠳᠡᠭᠳᠡᠷᠯᠡᠨ ᠠᠯᠠᠭᠯᠠᠵᠦ ᠤᠶᠤᠬᠤ ᠶᠢ ᠬᠡᠯᠡᠨ᠎ᠡ᠃4᠂ ᠬᠠᠭᠠᠯᠵᠦ ᠬᠠᠳᠬᠤᠬᠤ — ᠴᠡᠴᠡᠭ ᠮᠤᠲᠤ ᠶᠢᠨ ᠦᠷ᠎ᠡ ᠵᠢᠮᠢᠰ ᠪᠤᠶᠤ ᠨᠠᠪᠴᠢ ᠨᠠᠬᠢᠶ᠎ᠠ ᠶᠢ ᠬᠠᠳᠬᠤᠬᠤ  ᠳᠠᠭᠠᠨ ᠤᠶᠤᠬᠤ ᠬᠡᠰᠡᠭ ᠤᠨ ᠪᠡᠶ᠎ᠡ ᠶᠢᠨ ᠭᠤᠤᠯ ᠠᠴᠠ ᠨᠢ ᠬᠤᠶᠠᠷ ᠳᠡᠶᠢᠰᠢ ᠬᠠᠭᠠᠯᠵᠦ ᠤᠶᠤᠬᠤ ᠶᠢ ᠬᠡᠯᠡᠨ᠎ᠡ᠃5᠂ ᠭᠠᠳᠠᠨ᠎ᠠ ᠠᠴᠠ ᠲᠤᠲᠤᠭᠰᠢ ᠬᠤᠮᠢᠵᠦ ᠬᠠᠳᠬᠤᠬᠤ — ᠵᠢᠷᠤᠭ ᠤᠨ ᠨᠢᠭᠡ ᠬᠡᠰᠡᠭ ᠢ ᠤᠶᠤᠬᠤ ᠳᠠᠭᠠᠨ ᠤᠷᠢᠳ ᠢᠶᠠᠷ ᠭᠠᠳᠠᠷ ᠲᠠᠯ᠎ᠠ ᠠᠴᠠ ᠨᠢ ᠡᠬᠢᠯᠡᠵᠦ ᠲᠤᠲᠤᠭᠰᠢ ᠰᠢᠬᠠᠵᠦ ᠤᠶᠤᠬᠤ ᠶᠢ ᠬᠡᠯᠡᠨ᠎ᠡ᠃ ᠬᠳᠬᠤᠮᠠᠯ ᠤᠨ ᠳᠠᠪᠠᠭᠤᠯᠢᠭ ᠰᠠᠶᠢᠨ ᠲᠠᠯ᠎ᠠ ᠨᠢ ᠵᠢᠷᠤᠭ ᠲᠦᠷᠰᠦ ᠨᠢ ᠦᠩᠭᠡ ᠢᠯᠭᠠᠷᠠᠨ᠂ ᠭᠤᠶᠤ ᠦᠵᠡᠮᠤᠷᠢ᠂ ᠠᠮᠢᠲᠤ ᠲᠦᠷᠰᠦᠯᠢᠭ ᠨᠢ ᠤᠷᠠᠨ ᠬᠠᠳᠬᠤᠮᠠᠯᠴᠢᠨ ᠤ ᠤᠷ᠎ᠠ ᠠᠪᠢᠶᠠᠰ᠂ ᠴᠢᠳᠠᠪᠤᠷᠢ ᠮᠡᠷᠭᠡᠵᠢᠯ᠂ ᠤᠷᠠᠨ ᠤᠬᠠᠭᠠᠨ ᠢ ᠲᠤᠲᠤᠷᠠᠭᠤᠯᠤᠨ᠂ ᠪᠠᠶᠠᠨ ᠪᠠᠶᠢᠭᠠᠯᠢ ᠶᠢᠨ ᠭᠠᠶᠢᠬᠠᠮᠰᠢᠭ ᠢ ᠬᠠᠳᠬᠤᠨ ᠢᠯᠡᠷᠡᠭᠦᠯᠵᠦ᠂ ᠬᠦᠮᠦᠰ ᠲᠤ ᠭᠤᠸ᠎ᠠ ᠳᠠᠭᠠᠰᠢᠶᠠᠯ ᠢ ᠬᠦᠷᠲᠡᠭᠡᠲᠡᠭ᠃ ᠬᠠᠳᠬᠤᠮᠠᠯ ᠨᠢ ᠤᠷ᠎ᠠ ᠤᠬᠠᠭᠠᠨ᠂ ᠤᠶᠤᠳᠠᠯ ᠤᠨ ᠮᠡᠷᠭᠡᠵᠢᠯ ᠶᠡᠬᠡᠳᠡ ᠱᠠᠭᠠᠷᠳᠠᠭᠳᠠᠵᠦ᠂ ᠬᠦᠴᠦ ᠬᠦᠳᠡᠯᠮᠤᠷᠢ ᠶᠡᠬᠡᠬᠡᠨ ᠤᠷᠤᠳᠠᠭ᠃ ᠬᠠᠳᠬᠤᠮᠠᠯ ᠤᠶᠤᠳᠠᠯ ᠨᠢ ᠡᠮᠡᠭᠲᠡᠢ ᠬᠦᠮᠦᠨ ᠤ ᠡᠮᠦᠰᠬᠡᠯ ᠵᠠᠰᠠᠯ ᠳᠤ ᠢᠯᠡᠭᠦᠦ ᠪᠠᠶᠢᠵᠦ᠂ ᠡᠷᠡᠭᠲᠡᠢ ᠬᠦᠮᠦᠨ ᠤ ᠡᠮᠦᠰᠬᠡᠯ ᠵᠠᠰᠠᠯ ᠳᠤ ᠴᠦᠬᠡᠨ ᠬᠡᠷᠡᠭᠯᠡᠳᠡᠭ᠃     ︵ᠵᠢᠷᠭᠤᠭ᠎ᠠ︶ ᠨᠠᠭᠠᠮᠠᠯ — ᠨᠠᠭᠠᠮᠠᠯ ᠪᠤᠯ ᠵᠠᠰᠠᠭᠲᠤ ᠬᠤᠷᠴᠢᠨᠴᠤᠳ ᠤᠨ ᠭᠠᠷ ᠤᠶᠤᠳᠠᠯ ᠤᠷᠠᠯᠠᠯ ᠤᠨ ᠪᠡᠯᠭᠡ ᠳᠡᠮᠳᠡᠭ ᠪᠤᠯᠤᠭᠰᠠᠨ ᠪᠤᠰᠤᠳ ᠭᠠᠵᠠᠷ ᠤᠷᠤᠨ ᠢᠶᠠᠷ ᠳᠡᠮᠡᠢ ᠬᠠᠷᠠᠭᠳᠠᠳᠠᠭ ᠦᠬᠡᠢ ᠨᠤᠲᠤᠭ ᠤᠨ ᠤᠨᠴᠠᠯᠢᠭ  ᠲᠠᠢ ᠦᠪᠡᠷᠮᠢᠴᠡ ᠤᠶᠤᠳᠠᠯ ᠤᠷᠠᠯᠠᠯ ᠪᠤᠯᠤᠨ᠎ᠠ᠃ ᠨᠠᠭᠠᠮᠠᠯ ᠨᠢ ᠦᠩᠭᠡ ᠶᠢᠨ ᠲᠤᠷᠭ᠎ᠠ᠂ ᠪᠦᠰ᠂ ᠴᠢᠰᠴᠠᠦ᠂ ᠬᠤᠷᠭᠤᠢ ᠵᠡᠷᠭᠡ ᠶᠢᠨ ᠦᠬᠡᠳᠡᠰᠦ ᠪᠠᠷ ᠠᠮᠢᠳᠠᠨ ᠤᠷᠭᠤᠮᠠᠯ᠂ ᠴᠡᠴᠡᠭ ᠨᠠᠪᠴᠢ᠂ ᠦᠷ᠎ᠡ ᠵᠢᠮᠢᠰ ᠤᠨ ᠵᠢᠷᠤᠭ ᠲᠦᠷᠰᠦ ᠶᠢ ᠮᠤᠩᠭᠤᠯ ᠭᠤᠳᠤᠯ ᠱᠠᠬᠠᠢ᠂ ᠳᠡᠷ᠎ᠡ ᠶᠢᠨ ᠲᠦᠷᠦᠬᠦᠦ᠂ ᠳᠠᠮᠠᠬᠢᠨ ᠤᠭᠤᠳᠠ᠂ ᠬᠠᠪᠳᠠᠭ᠎ᠠ ᠳᠡᠯᠢᠩ᠂ ᠤᠤᠵᠢ ᠴᠤᠪᠠ᠂ ᠴᠢᠬᠢᠪᠴᠢ ᠵᠡᠭᠦᠪᠴᠢ ᠡᠮᠡᠭᠡᠯ ᠤᠨ ᠳᠡᠪᠰᠡ ᠵᠡᠷᠭᠡ ᠶᠢᠨ ᠳᠡᠭᠡᠷ᠎ᠡ ᠬᠡᠰᠡᠭᠯᠡᠨ ᠰᠡᠶᠢᠯᠵᠦ ᠨᠠᠭᠠᠯᠳᠤᠭᠤᠯᠵᠦ ᠪᠦᠲᠦᠭᠡᠭᠰᠡᠨ ᠭᠠᠷ ᠤᠶᠤᠳᠠᠯ ᠤᠨ ᠤᠨᠴᠠᠭᠠᠢ ᠨᠢᠭᠡ ᠲᠦᠷᠦᠯ ᠪᠤᠯᠤᠨ᠎ᠠ᠃ ᠨᠠᠭᠠᠮᠠᠯ ᠢ ᠨᠠᠭᠠᠬᠤ ᠳᠠᠭᠠᠨ ᠤᠷᠢᠳ ᠢᠶᠠᠷ ᠦᠯᠢᠭᠡᠷ ᠵᠢᠷᠤᠭ ᠢᠶᠠᠷ ᠵᠢᠷᠤᠵᠦ᠂ ᠬᠡᠰᠡᠭᠯᠡᠨ ᠰᠤᠩᠭᠤᠵᠦ ᠭᠠᠷᠭᠠᠭᠠᠳ ᠲᠤᠰ ᠵᠢᠷᠤᠭ ᠢᠶᠠᠨ ᠳᠠᠬᠢᠨ ᠴᠠᠭᠠᠰᠤᠨ ᠳᠡᠭᠡᠷ᠎ᠡ ᠪᠠᠭᠤᠯᠭᠠᠵᠦ ᠰᠡᠶᠢᠯᠤᠨ ᠠᠪᠴᠦ ᠨᠠᠭᠠᠮᠠᠯ ᠳᠤ ᠵᠠᠷᠤᠬᠤ ᠦᠩᠭᠡ ᠶᠢᠨ ᠦᠬᠡᠳᠡᠰᠦ ᠪᠠᠨ ᠰᠤᠩᠭᠤᠨ ᠳᠡᠭᠡᠷ᠎ᠡ ᠨᠢ ᠨᠠᠭᠠᠨ᠎ᠠ᠃ ᠳᠠᠷᠠᠭ᠎ᠠ ᠨᠢ ᠡᠨᠡ ᠬᠦ ᠴᠠᠷᠳᠠᠭᠰᠠᠨ ᠨᠠᠭᠠᠮᠠᠯ ᠲᠠᠢ ᠪᠦᠰ ᠢᠶᠠᠨ ᠬᠠᠶᠢᠴᠢᠯᠠᠨ ᠪᠠᠭᠤᠯᠭᠠᠵᠦ ᠰᠢᠯ ᠪᠤᠶᠤ ᠲᠤᠯᠢ ᠮᠡᠲᠦ ᠳᠡᠭᠰᠢ ᠬᠦᠯᠢᠭᠡᠷ ᠶᠠᠭᠤᠮᠠᠨ ᠳᠡᠭᠡᠷ᠎ᠡ ᠨᠠᠭᠠᠮᠠᠯ ᠵᠢᠷᠤᠭ ᠤᠨ ᠬᠦᠪᠡᠭᠡ ᠶᠢ ᠵᠠᠰᠠᠵᠦ ᠬᠡᠯᠪᠡᠷᠢᠵᠢᠭᠦᠯᠦᠭᠡᠳ᠂ ᠤᠤᠯ ᠦᠯᠢᠭᠡᠷ ᠵᠢᠷᠤᠭ ᠤᠨ ᠶᠤᠰᠤᠭᠠᠷ ᠬᠠᠷᠭᠤᠭᠤᠯᠤᠨ ᠨᠠᠭᠠᠯᠳᠤᠭᠤᠯᠵᠦ ᠪᠦᠲᠦᠭᠡᠨ᠎ᠡ᠃ ᠳᠡᠭᠡᠭᠡᠳ ᠬᠠᠳᠠᠭᠰᠠᠨ ᠨᠠᠭᠠᠮᠠᠯ ᠵᠢᠷᠤᠭ ᠲᠦᠷᠰᠦ ᠪᠠᠨ ᠭᠤᠳᠤᠯ ᠱᠠᠬᠠᠢ ᠶᠢᠨ ᠲᠦᠷᠡᠢ ᠵᠤᠯᠤᠭ ᠪᠤᠶᠤ ᠤᠭᠤᠳᠠ ᠬᠠᠪᠳᠠᠭ᠎ᠠ ᠶᠢᠨ ᠳᠤᠭᠳᠠᠭᠰᠠᠨ ᠭᠠᠵᠠᠷ ᠲᠠᠭᠠᠨ ᠨᠠᠭᠠᠯᠳᠤᠭᠤᠯᠤᠨ ᠳᠤᠭᠳᠠᠭᠠᠭᠰᠠᠨ ᠬᠤᠶᠢᠨ᠎ᠠ᠂ ᠳᠡᠭᠡᠷ᠎ᠡ ᠠᠴᠠ ᠨᠢ ᠬᠦᠨᠳᠦ ᠰᠢᠭ ᠶᠠᠭᠤᠮ᠎ᠠ ᠤᠯᠵᠦ ᠳᠠᠷᠤᠰᠢᠭᠤᠯᠵᠦ ᠳᠠᠯᠪᠢᠨ᠎ᠠ᠃ ᠳᠠᠷᠤᠰᠢᠵᠦ ᠬᠠᠳᠠᠭᠰᠠᠨ ᠬᠤᠶᠢᠨ᠎ᠠ᠂ ᠨᠠᠭᠠᠮᠠᠯ ᠤᠨ ᠢᠶᠠᠨ ᠬᠦᠪᠡᠭᠡ ᠳᠠᠭᠠᠦ ᠨᠢ ᠳᠠᠩ᠂ ᠳᠠᠪᠬᠤᠷ ᠮᠦᠷ ᠢᠶᠠᠷ ᠰᠢᠭᠯᠠᠵᠦ ᠤᠶᠤᠬᠤ ᠪᠤᠶᠤ ᠳᠠᠷᠤᠵᠦ ᠨᠦᠬᠦᠨ ᠪᠠᠬᠢᠯᠡᠨ ᠰᠠᠭᠤᠯᠭᠠᠵᠦ ᠤᠶᠤᠨ᠎ᠠ᠃ ᠨᠠᠭᠠᠮᠠᠯ ᠢ ᠰᠢᠭᠯᠠᠬᠤ ᠪᠠ ᠳᠠᠷᠤᠵᠦ ᠨᠦᠬᠦᠬᠦ ᠳᠤ ᠶᠤᠰᠤᠲᠠᠢ ᠤᠶᠤᠳᠠᠯᠴᠢᠨ ᠤ ᠤᠷᠠᠨ ᠢ ᠰᠢᠯᠭᠠᠳᠠᠭ᠃ ᠨᠠᠭᠠᠮᠠᠯ ᠬᠤᠸᠠᠷ ᠤᠨ ᠤᠷᠠᠯᠠᠯ ᠨᠢ ᠬᠦᠴᠢᠷ ᠲᠦᠪᠡᠭᠲᠡᠢ᠂ ᠴᠠᠭ ᠪᠠ ᠬᠦᠳᠡᠯᠮᠦᠷᠢ ᠢᠯᠡᠬᠦᠦ ᠬᠡᠷᠡᠭᠰᠡᠵᠦ ᠪᠠᠶᠢᠳᠠᠭ᠃ ᠬᠡᠶ᠎ᠡ ᠦᠨ᠎ᠡ ᠲᠠᠢ ᠶᠠᠭᠤᠮ᠎ᠠ ᠪᠡᠨ᠎ᠡ ᠲᠠᠢ ᠭᠡᠳᠡᠭ ᠢᠶᠠᠷ ᠨᠠᠭᠠᠮᠠᠯ ᠨᠢ ᠦᠵᠡᠬᠦ ᠳᠤ ᠭᠤᠶᠤ ᠠᠮᠢᠳᠤᠯᠢᠭ ᠮᠦᠷᠳᠡᠭᠡᠨ ᠦᠩᠬᠡ ᠢᠯᠭᠠᠷᠠᠮ᠎ᠠ ᠪᠠᠶᠢᠵᠦ᠃ ᠡᠳ᠋ᠯᠠᠵᠦ ᠡᠮᠦᠰᠬᠦ ᠳᠤ ᠬᠠᠳᠬᠤᠮᠠᠯ ᠢ ᠪᠤᠳᠤᠪᠠᠯ ᠪᠠᠬᠢᠯᠢᠭ᠌ ᠪᠠᠶᠢᠳᠠᠭ᠃ ᠨᠠᠭᠠᠮᠠᠯ ᠨᠢ ᠮᠦᠨ ᠴᠦ ᠡᠮᠡᠭᠲᠡᠢ ᠬᠦᠮᠦᠨ ᠤ ᠬᠤᠪᠴᠠᠰᠦ ᠵᠠᠰᠠᠯ ᠳᠤ ᠢᠯᠡᠭᠦᠦ ᠬᠡᠷᠡᠭᠯᠡᠵᠦ᠂ ᠡᠷᠡᠭᠲᠡᠢ ᠬᠦᠮᠦᠨ ᠤ ᠬᠠᠪᠳᠠᠭ᠎ᠠ᠂ ᠳᠠᠮᠠᠬᠢᠨ ᠤᠭᠤᠳᠠ᠂ ᠳᠠᠯᠢᠩ᠂ ᠡᠮᠡᠭᠡᠯ ᠤᠨ ᠳᠡᠪᠰᠡ ᠳᠤ ᠯᠡ ᠬᠡᠷᠡᠭᠯᠡᠳᠡᠭ᠃     ︵ᠲᠤᠯᠤᠭ᠎ᠠ︶ ᠰᠡᠶᠢᠯᠤᠮᠠᠯ —  ᠰᠡᠶᠢᠯᠤᠮᠠᠯ ᠤᠷᠠᠯᠠᠯ ᠮᠡᠷᠭᠡᠵᠢᠯ ᠤᠨ ᠤᠶᠤᠳᠠᠯ ᠨᠢ ᠬᠤᠷᠴᠢᠨ ᠮᠤᠩᠭᠤᠯ  ᠤᠨ ᠪᠦᠬᠡ ᠶᠢᠨ ᠡᠮᠦᠰᠭᠡᠯ᠂ ᠬᠤᠪᠴᠠᠰᠦ ᠳᠡᠪᠡᠯ᠂ ᠭᠤᠳᠤᠯ ᠱᠠᠬᠠᠢ᠂ ᠳᠡᠷ᠎ᠡ ᠶᠢᠨ ᠲᠦᠷᠦᠬᠦᠦ᠂ ᠤᠯᠪᠤᠭ ᠰᠢᠷᠢᠳᠡᠭ ᠂ ᠤᠭᠤᠳᠠ ᠰᠢᠭᠤᠳᠠᠢ᠂ ᠮᠤᠩᠭᠤᠯ ᠭᠡᠷ ᠤᠨ ᠬᠠᠨ᠎ᠠ ᠲᠤᠭᠤᠷᠭ᠎ᠠ᠂ ᠡᠮᠡᠭᠡᠯ ᠤᠨ ᠳᠡᠪᠰᠡ ᠵᠡᠷᠭᠡ ᠠᠮᠢᠳᠤᠷᠠᠯ ᠤᠨ ᠬᠡᠷᠡᠭᠰᠡᠯ ᠤᠨ ᠤᠯᠠᠨ ᠭᠠᠵᠠᠷ ᠲᠤ ᠬᠡᠷᠡᠭᠯᠡᠳᠡᠭ ᠡᠯᠳᠡᠪ ᠵᠠᠩᠵᠦ ᠶᠢᠨ ᠬᠡ ᠤᠭᠠᠯᠵᠠ ᠶᠢᠨ ᠤᠷᠠᠯᠠᠯ ᠤᠨ ᠭᠠᠷ ᠤᠶᠤᠳᠠᠯ ᠶᠤᠮ᠃ ᠰᠡᠶᠢᠯᠪᠤᠷᠢ ᠶᠢᠨ ᠵᠢᠷᠤᠭ ᠲᠤ ᠡᠬᠦᠯᠡᠨ ᠬᠡ᠂ ᠤᠰᠤᠨ ᠬᠡ᠂ ᠡᠷᠬᠡᠳᠡᠨ ᠭᠠᠷ᠂ ᠳᠠᠮᠠᠭ᠎ᠠ᠂ ᠵᠤᠭᠤᠰ ᠂ ᠦᠵᠦᠭ ᠬᠡᠬᠦ ᠮᠡᠲᠦ ᠶᠢᠨ ᠤᠯᠠᠨ ᠲᠦᠷᠦᠯ ᠤᠨ ᠵᠢᠷᠤᠭ ᠲᠦᠷᠰᠦ ᠪᠠᠶᠢᠳᠠᠭ᠃ ᠤᠷᠠᠨ ᠤᠶᠤᠳᠠᠯᠴᠢᠨ ᠨᠢ ᠦᠪᠡᠷ  ᠤᠨ ᠤᠷ᠎ᠠ ᠤᠬᠠᠭᠠᠨ ᠢᠶᠠᠷ ᠢᠶᠠᠨ ᠡᠯᠳᠡᠪ ᠰᠠᠶᠢᠬᠠᠨ ᠵᠢᠷᠤᠭ ᠲᠦᠷᠰᠦ ᠶᠢ ᠵᠤᠬᠢᠶᠠᠨ ᠰᠡᠶᠢᠯᠳᠡᠭ ᠶᠤᠮ᠃  ᠰᠡᠶᠢᠯᠤᠮᠠᠯ ᠢ ᠤᠷᠠᠯᠠᠬᠤ ᠳᠤ ᠤᠷᠢᠳ ᠢᠶᠠᠷ ᠬᠡ ᠤᠭᠠᠯᠵᠠ ᠶᠢᠨ ᠵᠢᠷᠤᠭ ᠢᠶᠠᠨ ᠰᠤᠩᠭᠤᠨ ᠵᠢᠷᠤᠵᠦ᠂ ᠳᠠᠷᠠᠭ᠎ᠠ ᠨᠢ ᠴᠠᠭᠠᠰᠤᠨ ᠳᠡᠭᠡᠷ᠎ᠡ ᠪᠠᠭᠤᠯᠭᠠᠨ ᠵᠢᠷᠤᠵᠦ ᠬᠠᠶᠢᠴᠢᠯᠠᠵᠦ ᠠᠪᠤᠭᠠᠳ ᠳᠠᠬᠢᠨ ᠰᠡᠶᠢᠯᠪᠤᠷᠢ ᠬᠢᠬᠦ ᠪᠦᠰ ᠪᠠᠷᠠᠭᠠᠠ ᠳᠡᠭᠡᠷ᠎ᠡ  ᠪᠠᠨ ᠨᠠᠭᠠᠯᠳᠤᠭᠤᠯᠤᠨ ᠨᠠᠭᠠᠵᠦ ᠬᠠᠳᠠᠭᠠᠭᠠᠳ᠂ ᠬᠠᠳᠠᠭᠰᠠᠨ ᠤ ᠳᠠᠷᠠᠭ᠎ᠠ ᠬᠡ ᠤᠭᠠᠯᠵᠠ ᠪᠠᠨ ᠰᠡᠶᠢᠯᠵᠦ ᠬᠠᠶᠢᠴᠢᠯᠠᠨ ᠪᠠᠭᠤᠯᠭᠠᠨ᠂ ᠲᠤᠬᠢᠷᠠᠭᠤᠯᠤᠨ ᠲᠤᠪᠬᠢᠵᠦ ᠰᠠᠭᠤᠯᠭᠠᠭᠠᠳ ᠬᠠᠮᠤᠭ ᠰᠡᠬᠦᠯ ᠳᠤᠨᠢ ᠳᠠᠷᠤᠵᠦ ᠨᠦᠬᠦᠬᠦ ᠠᠷᠭ᠎ᠠ ᠪᠠᠷ ᠰᠡᠶᠢᠯᠪᠤᠷᠢ ᠪᠠᠨ ᠤᠶᠤᠵᠦ ᠲᠤᠭᠳᠠᠭᠠᠨ᠎ᠠ᠃ ᠰᠡᠶᠢᠯᠤᠮᠠᠯ ᠨᠢ ᠦᠵᠡᠬᠦ ᠳᠤ ᠢᠯᠡ ᠲᠤᠲᠤ᠂ ᠬᠠᠷᠠᠭᠠᠨ ᠰᠡᠷᠡᠯᠲᠡ ᠲᠠᠢ᠂ ᠡᠳ᠋ᠯᠡᠬᠦ ᠳᠤ ᠪᠠᠬᠢᠯᠢᠭ᠌ ᠭᠤᠶᠤ ᠳᠠᠪᠠᠭᠤᠯᠢᠭ ᠲᠯ᠎ᠠ ᠲᠠᠢ᠃ ᠰᠡᠶᠢᠯᠤᠮᠠᠯ ᠨᠢ ᠭᠠᠵᠠᠷ ᠤᠷᠤᠨ ᠤ ᠠᠮᠢᠳᠤᠷᠠᠯ ᠰᠤᠶᠤᠯ ᠲᠠᠢ ᠬᠤᠯᠪᠤᠭᠳᠠᠬᠤ ᠦᠪᠡᠷᠮᠢᠴᠡ ᠦᠵᠡᠮᠤᠷᠢ ᠢᠯᠭᠠᠭ᠎ᠠ ᠲᠠᠢ ᠪᠠᠶᠢᠳᠠᠭ᠃     ︵ᠨᠠᠢᠮᠠ︶ ᠬᠦᠪᠦᠷᠢᠳᠬᠦ — ᠰᠦᠪᠡᠯᠡᠭᠰᠡᠨ ᠵᠡᠬᠦᠦ ᠪᠠᠨ ᠭᠠᠳᠠᠨ᠎ᠠ ᠠᠴᠠ ᠲᠤᠲᠤᠭᠰᠢ ᠡᠷᠬᠢᠬᠦᠯᠦᠨ ᠬᠠᠳᠬᠤᠵᠦ ᠤᠶᠤᠬᠤ ᠤᠶᠤᠳᠠᠯ ᠪᠤᠯᠤᠨ᠎ᠠ᠃ ᠬᠦᠪᠦᠷᠢᠳᠬᠦ ᠨᠢ ᠳᠠᠩ ᠬᠠᠳᠠᠭᠠᠰᠦ ᠦᠮᠦᠲᠦ ᠪᠤᠶᠤ ᠴᠡᠮᠴᠡ᠂ ᠤᠭᠤᠳᠠ ᠰᠠᠪᠠ ᠶᠢ ᠲᠦᠬᠦᠮ ᠢᠶᠠᠷ ᠪᠢᠳᠡᠭᠦᠯᠡᠵᠦ ᠤᠶᠤᠬᠤ ᠪᠠ ᠬᠠᠮᠤᠭ ᠴᠢᠬᠤᠯᠠ ᠨᠢ ᠬᠤᠷᠠᠭᠠᠨ ᠳᠡᠪᠡᠯ᠂ ᠰᠠᠩᠰᠠᠨ ᠳᠡᠪᠡᠯ᠂ ᠳ᠋ᠤᠯᠤᠤᠷ ᠳᠡᠪᠡᠯ᠂ ᠪᠦᠬᠡᠨᠴᠡ ᠳᠡᠪᠡᠯ ᠵᠡᠷᠭᠡ ᠭᠠᠳᠠᠷ ᠲᠠᠢ ᠳᠡᠪᠡᠯ ᠤᠨ ᠠᠷᠠᠰᠦ ᠶᠢ ᠡᠩᠨᠡᠭᠦᠯᠵᠦ ᠤᠶᠤᠬᠤ  ᠳᠤ ᠬᠡᠷᠡᠭᠯᠡᠬᠦ ᠲᠤᠰᠬᠠᠢ ᠤᠶᠤᠳᠠᠯ ᠪᠤᠯᠤᠨ᠎ᠠ᠃ ᠬᠤᠷᠠᠭ᠎ᠠ᠂ ᠰᠠᠩᠰᠠᠨ ᠳᠡᠪᠡᠯ ᠤᠨ ᠠᠷᠠᠰᠦ ᠶᠢᠨ ᠵᠤᠶᠢᠳᠠᠰᠦ ᠳᠠᠭᠠᠦ ᠳᠠᠩ᠂ ᠳᠠᠪᠬᠤᠷ ᠤᠳᠠᠰᠦ ᠪᠠᠷ ᠳᠠᠷᠤᠵᠦ ᠤᠶᠤᠳᠠᠭ ᠶᠤᠮ᠃ ᠭᠤᠳᠤᠯ ᠱᠠᠬᠠᠢ ᠶᠢᠨ ᠲᠦᠷᠡᠢ ᠵᠤᠯᠤᠭ ᠢ ᠪᠠᠵᠠᠭᠠᠭᠠᠳ ᠦᠩᠭᠡ ᠨᠠᠭᠠᠭᠰᠠᠨ ᠤ ᠰᠡᠭᠦᠯᠡᠷ ᠤᠷᠢᠳ ᠢᠶᠠᠷ ᠬᠦᠪᠡᠭᠡ ᠶᠢ ᠬᠦᠪᠦᠷᠢᠳᠦᠭᠡᠳ ᠰᠠᠶ᠋ᠢ ᠭᠤᠤᠯ ᠤᠶᠤᠳᠠᠯ ᠢᠶᠠᠨ ᠤᠷᠠᠯᠠᠳᠠᠭ ᠶᠤᠮ᠃ ᠡᠶᠢᠮᠦ ᠠᠴᠠ ᠬᠦᠪᠦᠷᠢᠳᠬᠦ ᠨᠢ ᠲᠦᠬᠦᠮ ᠬᠤᠷᠲᠤᠨ ᠬᠡᠷᠡᠭᠴᠡᠭᠡ ᠦᠷᠭᠡᠨ ᠨᠢᠭᠡ ᠵᠤᠶᠢᠯ ᠤᠨ ᠤᠶᠤᠳᠠᠯ ᠪᠤᠯᠤᠨ᠎ᠠ᠃     ︵ᠶᠢᠰᠦ︶ ᠬᠦᠰᠢᠬᠦ — ᠳᠠᠩ ᠦᠮᠦᠳᠦ᠂ ᠬᠠᠨᠳᠠᠭᠠᠰᠦ᠂ ᠴᠡᠮᠴᠠ ᠮᠡᠲᠦ ᠬᠤᠪᠴᠠᠰᠦ ᠬᠤᠨᠠᠷ ᠢ ᠡᠰᠭᠡᠯ ᠵᠤᠶᠢᠳᠠᠯ ᠳᠠᠭᠠᠦ ᠲᠦᠷᠭᠡᠨ ᠲᠦᠬᠦᠮ ᠬᠦᠰᠢᠵᠦ ᠤᠶᠤᠬᠤ ᠪᠤᠶᠤ ᠪᠦᠰ ᠤᠭᠤᠳᠠ ᠰᠢᠭᠤᠳᠠᠢ ᠶᠢᠨ ᠬᠠᠭᠠᠷᠬᠠᠢ ᠤᠩᠭᠤᠷᠬᠠᠢ ᠶᠢ ᠪᠢᠳᠡᠭᠦᠯᠡᠵᠦ ᠤᠶᠤᠬᠤ ᠲᠦᠬᠦᠮ ᠤᠶᠤᠳᠠᠯ ᠦᠢᠯᠡ ᠶᠢ ᠬᠡᠯᠡᠨ᠎ᠡ᠃ ᠮᠤᠩᠭᠤᠯᠴᠤᠳ ᠤᠶᠤᠳᠠᠯ ᠦᠬᠡᠢ ᠤᠯᠳᠤᠢ ᠵᠠᠯᠬᠠᠭᠤ ᠪᠦᠰᠡᠭᠦᠢ ᠶᠢ ︽ᠬᠦᠨᠳᠡᠯᠡᠨ ᠬᠦᠬᠡ ᠵᠡᠬᠦᠦ ᠬᠦᠰᠢᠬᠦ ᠶᠢ ᠮᠡᠳᠡᠬᠦ ᠦᠬᠡᠢ︾ ᠬᠡᠵᠦ ᠶᠤᠵᠤᠯᠠᠨ ᠶᠠᠷᠢᠳᠠᠭ ᠪᠢᠯᠡ᠃     ︵ᠠᠷᠪᠠ︶ ᠲᠤᠪᠬᠢᠬᠤ — ᠲᠠᠰᠤᠭ ᠪᠤᠰᠠᠭ᠂ ᠰᠠᠯᠤᠩᠬᠢ ᠪᠡᠶ᠎ᠡ ᠶᠢ ᠬᠡᠯᠬᠢᠨ ᠬᠤᠯᠪᠤᠬᠤ᠂ ᠦᠳᠡᠵᠦ ᠨᠡᠶᠢᠯᠡᠬᠦᠯᠵᠦ ᠳᠠᠯᠪᠢᠬᠤ ᠤᠶᠤᠳᠠᠯ ᠢ ᠬᠡᠯᠡᠨ᠎ᠡ᠃ ᠦᠬᠡᠷ᠎ᠡ ᠪᠠᠷ ᠬᠡᠯᠡᠪᠡᠯ᠂ ᠭᠤᠳᠤᠯ᠂ ᠱᠠᠬᠠᠢ ᠶᠢ ᠤᠯᠠᠯᠠᠬᠤ ᠳᠠᠭᠠᠨ ᠤᠷᠢᠳ ᠢᠶᠠᠷ ᠤᠯᠠ ᠵᠤᠯᠤᠭ ᠢ ᠵᠤᠬᠢᠴᠠᠭᠤᠯᠤᠨ ᠬᠤᠯᠪᠤᠵᠦ ᠲᠤᠪᠬᠢᠬᠤ᠂ ᠬᠤᠷᠠᠭᠠᠨ᠂ ᠰᠠᠩᠰᠠᠨ ᠭᠠᠳᠠᠷ ᠲᠠᠢ ᠳᠡᠪᠡᠯ  ᠤᠨ ᠠᠷᠠᠰᠦ ᠶᠢ ᠬᠦᠪᠦᠷᠢᠳᠬᠦ ᠠᠴᠠ ᠡᠮᠦᠨ᠎ᠡ ᠡᠩᠨᠡᠭᠦᠯᠦᠨ ᠲᠤᠪᠬᠢᠬᠤ ᠳᠤ ᠪᠦᠷ ᠲᠤᠰ ᠤᠶᠤᠳᠠᠯ ᠢ ᠬᠡᠷᠡᠭᠯᠡᠨ᠎ᠡ᠃     ︵ᠠᠷᠪᠠᠨ ᠨᠢᠭᠡ︶ ᠦᠬᠡᠰᠢᠯᠡᠬᠦ — ᠬᠤᠪᠴᠠᠰᠦ ᠳᠡᠪᠡᠯ ᠤᠨ ᠬᠠᠭᠠᠷᠬᠠᠢ ᠶᠢ ᠤᠶᠤᠬᠤ ᠳᠠᠭᠠᠨ ᠵᠤᠶᠢᠳᠠᠯ  ᠤᠨ ᠳᠠᠭᠠᠦ ᠰᠤᠯᠪᠢᠵᠦ ᠰᠦᠯᠵᠢᠬᠦ ᠤᠶᠤᠳᠠᠯ ᠢ ᠬᠡᠯᠡᠨ᠎ᠡ᠃     ︵ᠠᠷᠪᠠᠨ ᠬᠤᠶᠠᠷ︶ ᠰᠦᠯᠵᠢᠮᠡᠯ — ᠬᠤᠪᠴᠠᠰᠦ ᠬᠤᠨᠠᠷ ᠤᠨ ᠲᠤᠪᠴᠢ ᠶᠢᠨ ᠨᠦᠬᠡ ᠪᠤᠶᠤ ᠵᠢᠵᠢᠭ ᠴᠣᠭᠤᠷᠬᠠᠢ ᠶᠢᠨ ᠰᠡᠳᠡᠷᠡᠵᠦ ᠰᠦᠷᠴᠦ ᠪᠠᠷᠠᠭᠳᠠᠬᠤ ᠠᠴᠠ ᠰᠡᠷᠭᠡᠶᠢᠯᠡᠵᠦ᠂ ᠳᠠᠩ ᠤᠳᠠᠰᠦ ᠪᠠᠷ ᠨᠦᠬᠡ ᠶᠢᠨ ᠲᠤᠭᠤᠷᠢᠨ ᠢ ᠨᠢᠭᠡ ᠨᠢᠬᠡ ᠵᠡᠬᠦᠦ ᠪᠠᠷ ᠤᠷᠤᠭᠰᠢᠯᠠᠵᠦ ᠲᠠᠲᠠᠵᠦ ᠤᠶᠤᠬᠤ ᠲᠦᠬᠦᠮ ᠤᠶᠤᠳᠠᠯ ᠢ ᠬᠡᠯᠡᠨ᠎ᠡ᠃     ︵ᠠᠷᠪᠠᠨ ᠭᠤᠷᠪᠠ︶ ᠰᠢᠳᠡᠬᠦ — ᠳᠠᠪᠬᠤᠷ ᠪᠦᠰ ᠤᠨ ᠭᠤᠤᠯ ᠤᠶᠤᠳᠠᠯ ᠢ ᠤᠶᠤᠬᠤ ᠠᠴᠠ ᠡᠮᠦᠨ᠎ᠡ᠂ ᠲᠤᠲᠤᠷ ᠭᠠᠳᠠᠷ ᠨᠢ ᠰᠢᠯᠵᠢᠬᠦ ᠠᠴᠠ ᠪᠤᠯᠭᠤᠮᠵᠢᠯᠠᠨ ᠤᠷᠢᠳ ᠢᠶᠠᠷ ᠤᠶᠤᠳᠠᠯ ᠤᠨ ᠬᠦᠪᠡᠭᠡ ᠳᠠᠭᠠᠦ ᠬᠤᠶᠠᠷ ᠭᠤᠷᠪᠠᠨ ᠬᠤᠷᠤᠭᠤ ᠵᠠᠶᠢᠳᠠᠢ ᠪᠠᠷ ᠬᠤᠯᠠ ᠬᠤᠯᠠ ᠲᠤᠪᠬᠢᠵᠦ ᠬᠠᠳᠬᠤᠨ ᠤᠶᠤᠵᠦ ᠲᠤᠭᠳᠠᠭᠠᠬᠤ ᠶᠢ ᠬᠡᠯᠡᠨ᠎ᠡ᠃ ᠦᠬᠡᠷ᠎ᠡ ᠪᠠᠷ ᠬᠡᠯᠡᠪᠡᠯ᠂ ᠤᠤᠵᠢ ᠴᠤᠪᠠ᠂ ᠤᠤᠵᠢ ᠫᠠᠮ᠎ᠠ ᠮᠡᠲᠦ ᠲᠤᠲᠤᠷ ᠲᠠᠢ ᠬᠤᠪᠴᠠᠰᠦ ᠶᠢ ᠤᠶᠤᠬᠤ ᠠᠴᠠ ᠡᠮᠦᠨ᠎ᠡ ᠰᠢᠳᠡᠵᠦ ᠤᠶᠤᠭᠠᠳ᠂ ᠳᠠᠷᠠᠭ᠎ᠠ ᠨᠢ ᠰᠠᠶ᠋ᠢ ᠶᠡᠭᠡ ᠤᠶᠤᠳᠠᠯ ᠢᠶᠠᠨ ᠤᠶᠤᠵᠦ ᠪᠠᠷᠠᠭᠰᠠᠨ ᠤ ᠰᠡᠭᠦᠯᠡᠷ ᠰᠢᠳᠡᠭᠡᠷᠢ ᠶᠢᠨ ᠤᠳᠠᠰᠦ ᠪᠠᠨ ᠰᠤᠭᠤᠯᠵᠦ ᠠᠪᠳᠠᠭ᠃     ︵ᠠᠷᠪᠠᠨ ᠲᠦᠷᠪᠡ︶ ᠯᠡᠪᠳᠡᠭᠴᠡᠬᠦ ︵ᠨᠡᠪᠳᠡᠭᠴᠡᠬᠦ︶ — ᠯᠡᠪᠳᠡᠭᠴᠡᠬᠦ ᠪᠤᠯ ᠮᠤᠩᠭᠤᠯ ᠭᠡᠷ ᠤᠨ ᠢᠰᠡᠭᠡᠢ᠂ ᠲᠤᠪᠤ ᠲᠤᠯᠭ᠎ᠠ ᠶᠢᠨ ᠢᠰᠡᠭᠡᠢ᠂ ᠬᠠᠮ ᠲᠡᠷᠭᠡᠨ ᠤ ᠪᠦᠷᠬᠦᠬᠦᠯ ᠪᠤᠯᠤᠨ ᠨᠡᠬᠡᠢ ᠠᠷᠠᠰᠤᠨ ᠳᠡᠪᠡᠯ᠂I ᠢᠮᠠᠭᠠᠨ ᠳᠠᠬᠤ ᠮᠡᠳᠦ ᠪᠦᠳᠦᠬᠦᠨ ᠠᠷᠠᠰᠤᠨ ᠳᠡᠪᠡᠯ ᠤᠨ ᠤᠶᠤᠳᠠᠯ ᠳᠤ ᠬᠡᠷᠡᠭᠯᠡᠬᠦ ᠤᠶᠤᠳᠠᠯ ᠪᠤᠯᠤᠨ᠎ᠠ᠃ ᠤᠶᠤᠬᠤ ᠠᠷᠭ᠎ᠠ ᠨᠢ ᠢᠰᠡᠭᠡᠢ ᠪᠠ ᠬᠤᠨᠢ ᠢᠮᠠᠭᠠᠨ ᠠᠷᠠᠰᠦ ᠪᠠᠨ ᠤᠶᠤᠬᠤ ᠡᠰᠭᠡᠯ ᠵᠤᠶᠢᠳᠡᠯ ᠳᠠᠭᠠᠦ ᠴᠢᠴᠠᠥᠯᠠᠨ ᠵᠠᠯᠪᠠᠷᠢᠭᠤᠯᠵᠦ ᠠᠳᠬᠤᠨ ᠵᠡᠬᠦᠦ ᠤᠳᠠᠰᠦ ᠪᠠᠨ ᠨᠠᠭᠠᠰᠢ ᠴᠠᠭᠠᠰᠢ ᠬᠦᠨᠳᠡᠯᠡᠨ ᠢᠶᠠᠷ ᠨᠡᠪᠳᠡᠯᠤᠨ ᠬᠠᠳᠬᠤᠵᠦ ᠤᠶᠤᠬᠤ ᠶᠢ ᠬᠡᠯᠡᠨ᠎ᠡ᠃ ᠯᠡᠪᠳᠡᠭᠴᠡᠬᠦ ᠤᠶᠤᠳᠠᠯ ᠤᠨ ᠰᠠᠶᠢᠨ ᠲᠠᠯ᠎ᠠ ᠨᠢ ᠪᠠᠲᠦ ᠪᠠᠬᠢ᠂ ᠰᠠᠯᠬᠢ ᠵᠢᠳᠡᠷ ᠨᠡᠪᠳᠡᠷᠡᠬᠦ ᠦᠬᠡᠢ᠂ ᠪᠤᠷᠤᠭᠠᠨ ᠤ ᠤᠰᠤ ᠨᠡᠪᠴᠢᠬᠦ ᠶᠢ ᠰᠡᠷᠭᠡᠶᠢᠯᠡᠳᠡᠭ᠃     ︵ᠠᠷᠪᠠᠨ ᠳᠠᠪᠤ︶ ᠬᠠᠪᠬᠤ — ᠬᠦᠪᠦᠩ ᠫᠠᠮ᠎ᠠ ᠪᠤᠶᠤ ᠬᠦᠪᠦᠩ ᠤᠯᠤᠨᠳᠠᠢ᠂ ᠬᠦᠪᠦᠩ ᠦᠮᠦᠲᠦ ᠵᠡᠷᠭᠡ ᠬᠤᠪᠴᠠᠰᠦ ᠶᠢ ᠤᠶᠤᠬᠤ ᠤᠶᠤᠳᠠᠯ ᠪᠤᠯᠤᠨ᠎ᠠ᠃ ᠬᠤᠪᠴᠠᠰᠦ ᠶᠢᠨ ᠦᠩᠭᠡᠨ ᠲᠠᠯ᠎ᠠ ᠠᠴᠠ ᠨᠡᠪᠳᠡᠯᠵᠦ ᠵᠢᠰᠢᠬᠦᠦ ᠬᠠᠳᠬᠤᠨ᠂ ᠠᠷᠦ ᠳᠠᠯ᠎ᠠ ᠶᠢᠨ ᠨᠢᠲᠦ ᠶᠢ ᠪᠠᠭᠠᠬᠠᠨ ᠰᠢᠭ᠋ ᠭᠠᠷᠭᠠᠵᠦ ᠤᠶᠤᠳᠠᠭ᠃ ᠬᠠᠪᠠᠭᠠᠰᠦ ᠬᠠᠳᠠᠬᠤ ᠭᠡᠳᠡᠭ ᠨᠢ ᠬᠦᠪᠦᠩᠳᠡᠢ ᠬᠤᠪᠴᠠᠰᠤᠨ ᠤ ᠬᠦᠪᠦᠩ ᠨᠢ ᠰᠢᠯᠵᠢᠬᠦ ᠶᠢ ᠰᠡᠷᠭᠡᠶᠢᠯᠡᠨ ᠬᠤᠪᠴᠠᠰᠦ  ᠶᠢᠨ ᠭᠠᠳᠠᠷ ᠲᠤᠲᠤᠷ ᠪᠠ ᠲᠤᠮᠳᠠ ᠨᠢ ᠳᠠᠯᠪᠢᠭᠰᠠᠨ ᠬᠦᠪᠦᠩ ᠢ ᠬᠤᠯᠪᠤᠨ ᠤᠶᠤᠳᠠᠭ ᠤᠶᠤᠳᠠᠯ ᠪᠤᠯᠤᠨ᠎ᠠ᠃ ᠫᠠᠮ᠎ᠠ  ᠶᠢᠨ ᠬᠠᠪᠠᠭᠠᠰᠦ ᠨᠢ ᠪᠡᠶ᠎ᠡ ᠶᠢ ᠳᠠᠭᠠᠵᠦ ᠭᠤᠯᠳᠦ ᠪᠠᠶᠢᠵᠦ᠂ ᠬᠠᠨᠴᠤᠢ ᠶᠢᠨ ᠬᠠᠪᠠᠭᠠᠰᠦ ᠨᠢ ᠬᠦᠨᠳᠡᠯᠡᠨ ᠪᠠᠶᠢᠳᠠᠭ᠃ ᠬᠠᠪᠠᠭᠠᠰᠦ ᠶᠢ ᠤᠶᠤᠬᠤ ᠠᠷᠭ᠎ᠠ ᠨᠢ ᠳᠠᠩ ᠨᠢᠲᠦ ᠪᠠᠷ ᠬᠠᠪᠬᠤ ᠪᠠ ᠳᠠᠪᠬᠤᠷ ᠨᠢᠲᠦ ᠪᠠᠷ ᠬᠠᠪᠬᠤ ᠭᠡᠵᠦ ᠬᠤᠶᠠᠷ ᠵᠤᠶᠢᠯ ᠪᠠᠶᠢᠳᠠᠭ᠃
  
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
᠁
ᠲᠠᠯ᠎ᠠ ᠶᠢᠨ ᠰᠤᠳᠦᠨ ᠡᠵᠢ
ᠡᠭᠡ ᠤᠷᠤᠨ ᠮᠢᠨᠢ
ᠡᠨᠡᠷᠢᠯ ᠤᠨ ᠳᠡᠭᠷᠢ ᠡᠪ ᠬᠠᠮᠲᠦ ᠨᠠᠮ
ᠵᠠᠰᠠᠭᠲᠦ ᠤᠷᠴᠤᠨ ᠤ ᠦᠯᠦᠭᠡᠢ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号