ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠨ᠎ᠡ ᠬᠦᠳᠡᠭᠡ
ᠵᠠᠰᠠᠭᠲᠤ ᠮᠤᠩᠭᠤᠯᠴᠤᠳ ᠤᠨ ᠤᠯᠠᠮᠵᠢᠯᠠᠯᠲᠤ ᠲᠦᠷᠪᠡᠨ ᠴᠠᠭ ᠤᠨ ᠬᠤᠪᠴᠠᠰᠦ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2021/1/22
ᠨᠢᠬᠡ᠂ ᠬᠤᠪᠴᠠᠰᠦ ᠶᠢᠨ ᠲᠠᠶᠢᠯᠪᠤᠷᠢ    ᠬᠤᠪᠴᠠᠰᠦ ᠵᠠᠰᠠᠯ ᠪᠤᠯ ᠵᠤᠬᠢᠬᠤ ᠴᠠᠭ ᠦᠶ᠎ᠡ᠂ ᠵᠤᠬᠢᠬᠤ ᠨᠤᠲᠤᠭ ᠤᠰᠤᠨ ᠤ ᠬᠦᠮᠦᠨ᠂ ᠪᠠᠶᠢᠭᠠᠯᠢ᠂ ᠨᠡᠶᠢᠬᠡᠮ ᠭᠤᠷᠪᠠ ᠶᠢᠨ ᠢᠳᠡᠭᠡᠰᠢᠯ ᠤᠶᠠᠯᠳᠤᠯ ᠤᠨ ᠲᠤᠮᠳᠠ ᠪᠤᠳᠠᠳᠦ ᠪᠡᠶᠡᠯᠡᠯ ᠢᠶᠠᠨ ᠤᠯᠵᠦ᠂ ᠨᠡᠶᠢᠬᠡᠮ ᠤᠨ ᠬᠦᠭᠵᠢᠯᠲᠡ ᠶᠢ ᠳᠠᠭᠠᠯᠳᠤᠨ᠂ ᠳᠠᠰᠤᠷᠠᠯᠲᠠ ᠦᠬᠡᠢ ᠬᠤᠪᠢᠰᠤᠨ ᠦᠬᠡᠷᠡᠴᠢᠯᠡᠭᠳᠡᠳᠡᠭ ᠤᠶᠤᠨ ᠤ ᠪᠠᠶᠠᠯᠢᠭ ᠮᠦᠨ᠃ ᠵᠠᠰᠠᠭᠲᠤ ᠮᠤᠩᠭᠤᠯᠴᠤᠳ ᠤᠨ ᠬᠤᠪᠴᠠᠰᠦ ᠵᠠᠰᠠᠯ ᠤᠨ ᠳᠠᠯ᠎ᠠ ᠪᠠᠷ ᠦᠪᠡᠷᠮᠢᠴᠡ ᠤᠨᠴᠠᠯᠢᠭ ᠲᠠᠢ ᠪᠠᠶᠢᠵᠦ᠂ ᠴᠠᠭ ᠦᠶ᠎ᠡ ᠶᠢᠨ ᠳᠠᠪᠰᠢᠯᠲᠠ ᠶᠢ ᠳᠠᠭᠠᠯᠲᠤᠨ ᠤᠯᠠᠮᠵᠢᠯᠠᠯᠲᠤ ᠬᠤᠪᠴᠠᠰᠦ ᠵᠠᠰᠠᠯ ᠢᠶᠠᠨ ᠨᠡᠩ ᠭᠤᠶᠤ ᠭᠡᠭᠡᠨᠴᠢᠷ ᠪᠤᠯᠭᠠᠭᠰᠠᠭᠠᠷ ᠢᠷᠡᠵᠡᠢ ᠃    ᠵᠠᠰᠠᠭᠲᠤ ᠮᠤᠩᠭᠤᠯᠴᠤᠳ ᠡᠪᠦᠯ ᠤᠨ ᠤᠯᠠᠷᠢᠯ ᠳᠤ ᠨᠡᠬᠡᠢ ᠳᠡᠪᠡᠯ᠂ ᠭᠠᠳᠠᠷ ᠲᠠᠢ ᠨᠡᠬᠡᠢ ᠳᠡᠪᠡᠯ᠂ ᠢᠮᠠᠭᠠᠨ ᠠᠷᠠᠰᠦᠨ ᠳᠠᠬᠤ᠂ ᠠᠷᠠᠰᠦᠨ ᠦᠮᠦᠳᠦ᠂ ᠬᠦᠪᠦᠩ ᠦᠮᠦᠲᠦ ᠡᠮᠦᠰᠳᠡᠭ᠃ ᠬᠠᠪᠤᠷ ᠨᠠᠮᠤᠷ ᠤᠨ ᠤᠯᠠᠷᠢᠯ ᠳᠤ ᠴᠠᠭᠠᠮᠠᠯ ᠪᠠ ᠭᠠᠳᠠᠷ ᠲᠠᠢ ᠦᠵᠦᠭᠦᠷ ᠳᠡᠪᠡᠯ ︵ᠵᠤᠪᠴᠠᠭ᠎ᠠ︶ ᠰᠠᠩᠰᠠᠨ ᠳᠡᠪᠡᠯ᠂ ᠪᠦᠬᠡᠨᠴᠡ ᠳᠡᠪᠡᠯ᠂ ᠳ᠋ᠤᠯᠤᠤᠷ ᠳᠡᠪᠡᠯ᠂ ᠬᠤᠷᠠᠭᠠᠨ ᠳᠡᠪᠡᠯ᠂ ︵ᠬᠦᠷᠦᠪᠡᠨ ᠳᠡᠪᠡᠯ︶ ᠢᠰᠢᠬᠡᠨ ᠳᠡᠪᠡᠯ ︵ᠦᠨᠦᠬᠡᠨ ᠳᠡᠪᠡᠯ︶ ᠫᠠᠮ᠎ᠠ ︵ᠬᠦᠪᠦᠩ ᠳᠡᠷᠯᠢᠭ︶ ᠢᠯᠭᠡᠨ ᠦᠮᠦᠳᠦ᠂ ᠬᠦᠪᠦᠩ ᠦᠮᠦᠳᠦ᠂ ᠭᠤᠴᠤᠭ ︵ᠡᠪᠦᠳᠦᠭᠴᠢ︶ ᠡᠮᠦᠰᠦᠨ᠎ᠡ᠃ ᠵᠤᠨ ᠤ ᠤᠯᠠᠷᠢᠯ  ᠳᠤ ᠬᠠᠨᠳᠠᠭᠠᠴᠠ᠂ ᠴᠠᠮᠴᠠ᠂ ᠵᠠᠭᠠᠳᠠ ︵ᠳᠠᠪᠬᠤᠷ ᠳᠡᠷᠯᠢᠭ︶᠂ ᠳᠠᠩ ᠦᠮᠦᠳᠦ᠂ ᠳᠠᠪᠬᠤᠷ ᠪᠦᠰ ᠦᠮᠦᠳᠦ ᠡᠮᠦᠰᠳᠡᠭ᠃    ᠵᠠᠰᠠᠭᠳᠤᠴᠤᠳ ᠤᠨ ᠮᠠᠯᠠᠭᠠᠢ ᠪᠦᠰᠡ ᠶᠢᠨ ᠬᠤᠪᠢ ᠳᠤ ᠡᠪᠦᠯ᠂ ᠬᠠᠪᠤᠷ᠂ ᠨᠠᠮᠤᠷ ᠤᠨ ᠰᠡᠷᠢᠬᠦᠨ ᠴᠠᠭ ᠲᠤ ᠪᠦᠴᠡᠯᠡᠬᠦᠷ ᠮᠠᠯᠠᠭᠠᠢ᠂ ᠮᠠᠬᠤᠵᠠ ᠮᠠᠯᠠᠭᠠᠢ᠂ ᠲᠤᠭᠤᠷᠢᠭᠤᠯ ᠮᠠᠯᠠᠭᠠᠢ ᠵᠡᠬᠦᠵᠦ᠂ ᠮᠠᠯᠠᠭᠠᠢ ᠳᠤ ᠪᠠᠨ ᠬᠠᠯᠢᠭᠤ᠂ ᠪᠤᠯᠠᠭ᠎ᠠ᠂ ᠦᠨᠡᠭᠡ᠂ ᠬᠢᠷᠰᠠ᠂ ᠬᠤᠷᠠᠭᠠᠨ ᠠᠷᠠᠰᠦ᠂ ᠰᠠᠩᠰᠠᠨ ᠠᠷᠠᠰᠦ ᠬᠠᠳᠠᠳᠠᠭ᠃ ᠵᠤᠨ ᠤ ᠤᠯᠠᠷᠢᠯ ᠪᠤᠶᠤ ᠲᠤᠯᠠᠭᠠᠨ ᠴᠠᠭ ᠲᠤ ᠲᠤᠭᠤᠷᠴᠤᠭ ᠮᠠᠯᠠᠭᠠᠢ ᠪᠤᠶᠤ ᠴᠠᠭᠠᠨ ᠪᠦᠰ ᠠᠯᠴᠢᠭᠤᠷ ᠢ ᠬᠤᠰᠢᠭᠤᠴᠢᠯᠠᠨ ᠲᠤᠯᠤᠭᠠᠢ ᠳᠤ ᠤᠷᠢᠶᠠᠳᠠᠭ ᠵᠠᠩᠰᠢᠯ ᠲᠠᠢ᠃ ᠡᠮᠡᠭᠳᠡᠶᠢᠴᠤᠳ ᠤᠨ ᠲᠤᠯᠤᠭᠠᠢ ᠶᠢᠨ ᠵᠠᠰᠠᠯ᠂ ᠠᠯᠴᠢᠭᠤᠷ ᠴᠢᠬᠢᠪᠴᠢ᠂ ᠵᠡᠬᠦᠪᠴᠢ ᠵᠡᠷᠭᠡ ᠪᠠᠶᠢᠳᠠᠭ᠃ ᠵᠠᠰᠠᠭᠲᠤᠴᠤᠳ ᠮᠦᠩᠬᠦᠨ ᠪᠦᠰᠡ᠂ ᠲᠤᠷᠭᠠᠨ ᠪᠦᠰᠡ᠂ ᠪᠦᠰ ᠪᠦᠰᠡ᠂ ᠰᠤᠷ ᠪᠦᠰᠡ ᠪᠦᠰᠡᠯᠡᠳᠡᠭ ᠶᠤᠮ᠃    ᠵᠠᠰᠠᠭᠲᠤᠴᠤᠳ ᠤᠨ ᠭᠤᠳᠤᠯ ᠤᠨ ᠬᠤᠪᠢ ᠳᠤ ᠬᠡᠯᠡᠪᠡᠯ᠂ ᠪᠤᠯᠢᠭᠠᠷᠢᠨ ᠭᠤᠳᠤᠯ᠂ ᠦᠬᠡᠳᠡᠩ ᠭᠤᠳᠤᠯ᠂ ᠪᠦᠰ ᠭᠤᠳᠤᠯ᠂ ᠢᠰᠡᠭᠡᠢ ᠭᠤᠳᠤᠯ᠂ ᠢᠰᠡᠬᠡᠢ ᠪᠤᠶᠢᠪᠤᠭ᠂ ᠠᠷᠠᠰᠦᠨ ᠭᠤᠳᠤᠯ ᠡᠳ᠋ᠯᠡᠨ᠂ ᠶᠡᠷᠦ ᠳᠤ ᠪᠠᠨ ᠤᠶᠤᠮᠠᠯ ᠪᠦᠰ ᠭᠤᠳᠤᠯ ᠡᠮᠦᠰᠦᠨ᠎ᠡ᠃ ᠢᠰᠡᠬᠡᠢ ᠭᠤᠳᠤᠯ᠂ ᠳᠡᠩᠳᠡᠮᠤᠨ ᠭᠤᠳᠤᠯ ᠢ ᠳᠡᠰᠬᠢᠮ᠎ᠡ ᠬᠦᠢᠳᠡᠨ ᠳᠤ ᠮᠠᠯ ᠠᠳᠤᠭᠤ ᠬᠠᠷᠢᠭᠤᠯᠵᠦ ᠮᠠᠨᠠᠬᠤ᠂ ᠠᠶᠠᠨ ᠵᠢᠩ ᠳᠤ ᠶᠠᠪᠤᠬᠤ ᠳᠠᠭᠠᠨ ᠡᠮᠦᠰᠳᠡᠭ᠃ ᠢᠰᠡᠬᠡᠢ ᠪᠤᠶᠢᠪᠤᠭ᠂ ᠠᠷᠠᠰᠦᠨ ᠪᠤᠶᠢᠪᠤᠭ ᠢ ᠨᠢᠯᠬ᠎ᠠ ᠬᠡᠥᠬᠡᠳ ᠲᠤ ᠡᠮᠦᠰᠬᠡᠳᠡᠭ᠃     ᠮᠤᠩᠭᠤᠯᠴᠤᠳ ᠤᠨ ᠡᠨᠡᠬᠦ ᠪᠠᠶᠢᠭᠠᠯᠢ ᠠᠮᠢᠳᠤᠷᠠᠯ ᠠᠴᠠ ᠪᠠᠨ ᠡᠬᠦᠰᠦᠭᠰᠡᠨ ᠡᠮᠦᠰᠬᠡᠯ ᠵᠡᠬᠦᠳᠡᠯ ᠤᠨ ᠰᠤᠶᠤᠯ  ᠢᠶᠠᠷ ᠢᠶᠠᠨ ᠳᠠᠮᠵᠢᠵᠦ ᠦᠶ᠎ᠡ ᠳᠠᠮᠵᠢᠭᠰᠠᠨ ᠤᠯᠠᠨ ᠰᠠᠶᠢᠬᠠᠨ ᠰᠤᠷᠭᠠᠯ ᠦᠬᠡ᠂ ᠵᠤᠶᠢᠷ ᠰᠡᠴᠡᠨ ᠶᠠᠷᠢᠶ᠎ᠠ ᠨᠢ ᠤᠳᠤ ᠪᠤᠯᠳᠠᠯ᠎ᠠ ᠠᠷᠠᠳ ᠤᠨ ᠲᠤᠮᠳᠠ ᠤᠯᠠᠮᠵᠢᠯᠠᠭᠳᠠᠭᠰᠠᠭᠠᠷ ᠶᠤᠮ᠃ ᠵᠢᠱᠢᠶᠡᠯᠡᠪᠡᠯ᠄ ︽ᠬᠦᠮᠦᠨ ᠡᠮᠦᠰᠬᠦ ᠪᠠᠷ᠂ ᠮᠠᠯ ᠮᠢᠬ᠎ᠠ ᠪᠠᠷ︾᠂ ︽ᠮᠠᠯ ᠡᠵᠡᠨ ᠢᠶᠠᠨ᠂ ᠮᠠᠯᠠᠭᠠᠢ ᠲᠤᠯᠤᠭᠠᠢ ᠪᠠᠨ︾᠂ ︽ᠳᠡᠪᠡᠯ ᠤᠨ ᠵᠠᠭᠠᠮ᠎ᠠ ᠨᠢ ᠳᠡᠭᠰᠢ ᠪᠤᠯ ᠲᠦᠷᠪᠡᠨ ᠬᠤᠷᠮᠤᠢ ᠨᠢ ᠳᠡᠭᠰᠢ︾᠂ ︽ᠬᠦᠮᠦᠨ ᠲᠦᠷᠦᠬᠦᠦ ᠲᠠᠢ᠂ ᠳᠡᠪᠡᠯ ᠵᠠᠭᠠᠮ᠎ᠠ ᠲᠠᠢ︾ ᠁ ᠬᠡᠬᠦ ᠵᠡᠷᠭᠡ ᠠᠵᠢᠯ ᠠᠮᠢᠳᠤᠷᠠᠯ ᠳᠤ ᠠᠴᠢ ᠲᠤᠰᠠᠳᠠᠢ ᠰᠤᠶᠤᠯ ᠰᠤᠷᠭᠠᠯ ᠤᠳ ᠪᠠᠶᠢᠳᠠᠭ ᠶᠤᠮ᠃     ᠴᠠᠮᠴᠠ — ᠵᠤᠨ ᠤ ᠤᠯᠠᠷᠢᠯ ᠳᠤ ᠡᠮᠦᠰᠬᠦ ᠳᠠᠩ ᠳᠡᠷᠯᠢᠭ᠂ ᠲᠤᠷᠭ᠎ᠠ᠂ ᠪᠦᠰ᠂ ᠴᠢᠰᠴᠠᠦ ᠪᠠᠷ ᠬᠢᠳᠡᠭ᠃ ᠡᠷᠡᠭᠲᠡᠢ ᠡᠮᠡᠭᠳᠡᠢ ᠶᠢᠨ ᠬᠢ ᠦᠩᠬᠡ ᠪᠠᠷ ᠢᠯᠭᠠᠵᠦ᠂ ᠡᠷᠡᠭᠲᠡᠢ ᠶᠢᠨ ᠳᠡᠪᠡᠯ ᠢ ᠴᠢᠮᠬᠢᠵᠦ ᠡᠮᠵᠢᠶᠡᠷᠢᠯᠡᠨ᠂ ᠡᠮᠡᠭᠲᠡᠢ  ᠶᠢᠨ ᠴᠠᠮᠴᠠ ᠶᠢ ᠬᠤᠰᠢᠯᠠᠵᠦ ᠡᠮᠵᠢᠶᠡᠷᠢᠯᠡᠳᠡᠭ᠃     ᠵᠠᠭᠠᠳᠠ — ᠳᠠᠪᠬᠤᠷ ᠳᠡᠷᠯᠢᠭ᠃ ᠮᠦᠨ ᠴᠦ ᠪᠦᠰ᠂ ᠲᠤᠷᠭ᠎ᠠ᠂ ᠴᠢᠰᠴᠠᠦ᠂ ᠳᠡᠯᠢᠩᠪᠦ ᠵᠡᠷᠭᠡ ᠪᠠᠷ ᠬᠢᠵᠦ ᠡᠮᠵᠢᠶᠡᠷᠢ᠂ ᠬᠤᠰᠢᠯᠠᠩ ᠨᠢ ᠴᠠᠮᠴᠠ ᠶᠢᠨ ᠦᠩᠬᠡ ᠳᠡᠭᠡᠨ ᠵᠤᠬᠢᠴᠠᠭᠤᠯᠤᠨ ᠳᠠᠭᠠᠷᠠᠭᠤᠯᠳᠠᠭ᠃     ᠫᠠᠮ᠎ᠠ — ᠬᠦᠪᠦᠩ ᠲᠡᠷᠯᠢᠭ᠃ ᠡᠷᠡᠭᠲᠡᠢ ᠶᠢᠨ ᠬᠢ ᠭᠤᠤᠯᠳᠠᠭᠤ ᠬᠦᠬᠡ ᠦᠩᠬᠡ ᠪᠠᠷ ᠬᠢᠵᠦ᠂ ᠡᠮᠡᠭᠲᠡᠢ ᠶᠢᠨ  ᠬᠢ ᠪᠤᠯ ᠴᠡᠩᠬᠡᠷ᠂ ᠨᠤᠭᠤᠭᠠᠨ᠂ ᠶᠠᠭᠠᠨ ᠦᠩᠬᠡ ᠪᠠᠷ ᠭᠠᠳᠠᠷᠯᠠᠳᠠᠭ᠃ ᠡᠷᠡᠭᠲᠡᠢ ᠶᠢᠨ ᠬᠢ ᠶᠢ ᠨᠤᠭᠤᠭᠠᠨ ᠢᠶᠠᠷ ᠴᠢᠮᠬᠢᠵᠦ ᠡᠮᠵᠢᠶᠡᠷᠢᠯᠡᠨ ᠡᠮᠡᠭᠲᠡᠢ ᠶᠢᠨ ᠬᠢ ᠳᠡᠪᠡᠯ ᠤᠨ ᠦᠩᠬᠡ ᠲᠠᠢ ᠲᠤᠲᠤ ᠵᠤᠬᠢᠴᠠᠩᠭᠤᠢ ᠦᠩᠬᠡ ᠪᠠᠷ ᠬᠤᠰᠢᠯᠠᠵᠦ ᠬᠤᠤᠰᠯᠠᠨ ᠡᠮᠵᠢᠶᠡᠷᠢᠯᠡᠳᠡᠭ᠃     ᠴᠤᠪᠠ — ᠤᠷᠲᠤ ᠬᠤᠷᠮᠤᠢ ᠲᠠᠢ᠃ ᠬᠤᠶᠠᠷ ᠲᠠᠰᠢᠶᠠᠨ ᠤᠨᠤᠭᠤ ᠲᠠᠢ᠂ ᠬᠠᠨᠴᠤᠢ ᠦᠬᠡᠢ᠂ ᠵᠢᠰᠢᠬᠦᠦ ᠡᠩᠬᠡᠷ  ᠲᠠᠢ᠂ ᠴᠠᠮᠴᠠ᠂ ᠵᠠᠭᠠᠳᠠ ᠶᠢᠨ ᠭᠠᠳᠠᠭᠤᠷ ᠳᠠᠪᠬᠤᠷᠯᠠᠵᠦ ᠡᠮᠦᠰᠬᠦ ᠵᠠᠰᠠᠯ ᠤᠨ ᠬᠤᠪᠴᠠᠰᠦ᠃ ᠵᠠᠷᠢᠮ ᠭᠠᠵᠠᠷ ᠤᠭᠤᠵᠢᠮᠠᠭ ᠬᠡᠵᠦ ᠶᠠᠷᠢᠳᠠᠭ᠃ ᠪᠦᠰᠡᠬᠦᠶᠢᠴᠤᠳ ᠡᠮᠦᠰᠴᠦ᠂ ᠬᠡᠥᠬᠡᠨ ᠬᠦᠮᠦᠨ ᠶᠡᠷᠦ ᠡᠮᠦᠰᠳᠡᠭ ᠦᠬᠡᠢ᠃     ᠤᠭᠤᠵᠢ — ᠤᠬᠤᠷ ᠬᠤᠷᠮᠤᠢ᠂ ᠠᠰ ᠪᠤᠶᠤ ᠵᠦᠷᠢᠬᠦᠦ ᠡᠩᠬᠡᠷ ᠲᠠᠢ ᠳᠠᠪᠬᠤᠴᠠᠯᠠᠵᠦ ᠡᠮᠦᠰᠬᠦ ᠵᠠᠰᠠᠯ ᠤᠨ ᠬᠤᠪᠴᠠᠰᠦ᠂ ᠬᠤᠷᠭᠤᠢ᠂ ᠲᠤᠷᠭ᠎ᠠ᠂ ᠪᠦᠰ᠂ ᠴᠢᠰᠴᠠᠦ ᠪᠦᠰ ᠪᠠᠷᠠᠭ᠎ᠠ ᠪᠠᠷ ᠪᠦᠷ ᠬᠢᠳᠡᠭ᠃     ᠬᠤᠷᠠᠭᠠᠨ ᠳᠡᠪᠡᠯ — ᠲᠦᠷᠦᠬᠡᠳ ᠰᠠᠷ᠎ᠠ ᠭᠠᠷᠤᠢ ᠬᠤᠭᠤᠴᠠᠭᠠᠨ ᠳᠠᠬᠢ ᠨᠤᠳᠤᠭ ᠤᠨ ᠡᠬᠦᠯᠳᠡᠷ ᠤᠨ ᠬᠤᠨᠢᠨ  ᠤ ᠲᠦᠯ ᠤᠨ ᠠᠷᠠᠰᠦ ᠪᠠᠷ ᠬᠢᠭᠰᠡᠨ ᠭᠠᠳᠠᠷ ᠲᠠᠢ ᠳᠡᠪᠡᠯ᠂ ᠲᠤᠮᠤ ᠬᠦᠮᠦᠨ ᠤ ᠳᠡᠪᠡᠯ ᠳᠤ ᠪᠠᠷᠤᠭ ᠭᠤᠴᠢᠨ ᠬᠤᠷᠠᠭᠠᠨ ᠠᠷᠠᠰᠦ ᠤᠷᠤᠨ᠎ᠠ᠃ ᠪᠦᠰ᠂ ᠲᠤᠷᠭ᠎ᠠ ᠪᠠᠷ ᠭᠠᠳᠠᠷ ᠲᠠᠲᠠᠨ᠎ᠠ᠃     ᠰᠠᠩᠰᠠᠨ ᠳᠡᠪᠡᠯ — ᠨᠤᠲᠤᠭ ᠤᠨ ᠡᠬᠦᠯᠳᠡᠷ ᠬᠤᠨᠢ ᠲᠦᠷᠦᠬᠡᠳ 70 —80 ᠡᠲᠦᠷ ᠪᠤᠯᠵᠦ ᠪᠠᠶᠢᠭ᠎ᠠ ᠦᠶ᠎ᠡ  ᠳᠤ ᠲᠤᠰᠬᠠᠶᠢᠯᠠᠨ ᠰᠤᠩᠭᠤᠵᠦ ᠨᠢᠲᠤᠯᠵᠦ ᠠᠪᠤᠭᠰᠠᠨ ᠭᠤᠭᠴᠤᠭᠠᠷᠠᠮᠠᠯ ᠦᠰᠦ ᠲᠠᠢ ᠠᠷᠠᠰᠦ ᠪᠠᠷ ᠬᠢᠭᠰᠡᠨ ᠳᠡᠪᠡᠯ᠃ ᠲᠤᠮᠤ ᠬᠦᠮᠦᠨ ᠳᠤ ᠳᠡᠪᠡᠯ ᠬᠢᠬᠦ ᠳᠤ ᠪᠠᠷᠤᠭ ᠠᠷᠪᠠᠨ ᠭᠤᠷᠪᠠᠨ ᠠᠷᠠᠰᠦ ᠬᠡᠷᠡᠭᠯᠡᠨ᠎ᠡ᠃ ᠰᠠᠩᠰᠠᠨ ᠳᠡᠪᠡᠯ ᠢ ᠮᠦᠨ ᠠᠷ ᠲᠠᠢ ᠪᠦᠰ ᠪᠤᠶᠤ ᠲᠤᠷᠭ᠎ᠠ᠂ ᠴᠢᠰᠴᠠᠦ ᠪᠠᠷᠠᠭ᠎ᠠ ᠪᠠᠷ ᠭᠠᠳᠠᠷ ᠲᠠᠲᠠᠨ᠎ᠠ᠃ ᠳ᠋ᠤᠯᠤᠤᠷ ᠳᠡᠪᠡᠯ — ᠨᠤᠲᠤᠭ ᠤᠨ ᠬᠤᠨᠢᠨ ᠤ ᠬᠤᠷᠠᠭ᠎ᠠ ᠲᠦᠷᠦᠬᠡᠳ 80 — 100 ᠡᠲᠦᠷ ᠪᠤᠯᠬᠤ ᠦᠶ᠎ᠡ ᠳᠤ ᠲᠤᠰᠬᠠᠢ ᠰᠤᠩᠭᠤᠵᠦ ᠨᠢᠳᠤᠯᠵᠦ ᠠᠪᠤᠭᠰᠠᠨ ᠰᠠᠩᠰᠠᠨ ᠦᠰᠦ ᠠᠴᠠ ᠵᠢᠭᠠᠬᠠᠨ ᠤᠷᠲᠤ ᠮᠦᠷᠳᠡᠬᠡᠨ ᠭᠤᠭᠴᠤᠷᠠᠭ᠎ᠠ  ᠨᠢ ᠤᠯᠠᠮ ᠢᠯᠡᠬᠦᠦ ᠪᠠᠶᠢᠳᠠᠭ ᠦᠨᠡᠲᠦ ᠠᠷᠠᠰᠦ ᠪᠠᠷ ᠬᠢᠭᠰᠡᠨ ᠳᠡᠪᠡᠯ᠃ ᠶᠡᠭᠡ ᠬᠦᠮᠦᠨ ᠤ ᠳᠡᠪᠡᠯ ᠳᠤ ᠪᠠᠷᠤᠭ ᠠᠷᠪᠠᠨ ᠨᠢᠬᠡᠨ ᠠᠷᠠᠰᠦ ᠬᠡᠷᠡᠭᠯᠡᠨ᠎ᠡ᠃ ᠭᠠᠳᠠᠷᠯᠠᠵᠦ ᠡᠮᠵᠢᠶᠡᠷᠢᠯᠡᠵᠦ ᠤᠷᠠᠯᠠᠬᠤ ᠨᠢ ᠰᠠᠩᠰᠠᠨ ᠳᠡᠪᠡᠯ ᠲᠠᠢ ᠪᠠᠷᠤᠭ ᠠᠳᠠᠯᠢ ᠪᠠᠶᠢᠳᠠᠭ᠃     ᠦᠵᠦᠬᠦᠷ ᠳᠡᠪᠡᠯ — ᠨᠤᠲᠤᠭ ᠤᠨ ᠬᠤᠨᠢ ᠶᠢ ᠨᠢᠬᠡ ᠵᠢᠯ ᠳᠤ ᠬᠤᠶᠠᠷ ᠤᠳᠠᠭ᠎ᠠ ᠬᠢᠷᠭᠠᠳᠠᠭ᠃ ᠦᠵᠦᠬᠦᠷ ᠦᠰᠦ ᠨᠢ ᠨᠠᠮᠤᠷ ᠤᠨ ᠬᠤᠨᠢ ᠶᠢ ᠬᠢᠷᠭᠠᠭᠰᠠᠨ ᠤ ᠳᠠᠷᠠᠭ᠎ᠠ ᠬᠤᠶᠠᠷ ᠰᠠᠷ᠎ᠠ ᠰᠢᠬᠠᠮ ᠤᠨ ᠦᠶ᠎ᠡ ᠨᠢᠳᠤᠯᠵᠦ ᠠᠪᠤᠭᠰᠠᠨ ᠠᠷᠠᠰᠦᠨ ᠳᠡᠪᠡᠯ ᠢ ᠬᠡᠯᠡᠳᠡᠭ᠃ ᠦᠵᠦᠭᠦᠷ ︵ᠦᠵᠦᠬᠦᠷᠰᠡᠭ︶ ᠳᠡᠪᠡᠯ ᠢ ᠴᠠᠭᠠᠮᠠᠯ ᠦᠵᠦᠭᠦᠷ ᠳᠡᠪᠡᠯ᠂ ᠭᠠᠳᠠᠷ ᠲᠠᠢ ᠦᠵᠦᠬᠦᠷ ︵ᠵᠤᠪᠴᠠᠭ᠎ᠠ︶ ᠳᠡᠪᠡᠯ ᠬᠡᠵᠦ ᠢᠯᠭᠠᠨ᠂ ᠲᠤᠮᠤ ᠬᠦᠮᠦᠨ ᠳᠤ ᠳᠡᠪᠡᠯ ᠬᠢᠬᠦ ᠳᠤ ᠪᠠᠷᠤᠭ ᠨᠠᠢᠮᠠ ᠶᠢᠰᠦᠨ ᠬᠤᠨᠢᠨ ᠠᠷᠠᠰᠦ ᠬᠡᠷᠡᠭᠯᠡᠳᠡᠭ᠃     ᠨᠡᠬᠡᠢ ᠳᠡᠪᠡᠯ — ᠨᠡᠬᠡᠢ ᠠᠷᠠᠰᠦ ᠬᠡᠳᠡᠭ ᠨᠢ ᠬᠠᠪᠤᠷ ᠤᠨ ᠬᠠᠶᠢᠴᠢᠯᠠᠭᠰᠠᠨ ᠬᠤᠨᠢ ᠶᠢ ᠨᠠᠮᠤᠷ ᠠᠬᠤᠷᠯᠠᠭᠰᠠᠨ ᠦᠬᠡᠢ᠂ ᠡᠪᠦᠯ ᠤᠨ ᠠᠯᠠᠰᠢᠨ ᠤ ᠦᠶ᠎ᠡ ᠳᠤ ᠨᠢᠳᠤᠯᠤᠭᠰᠠᠨ ᠲᠤᠮᠤ ᠡᠷ᠎ᠡ ᠬᠤᠨᠢ ᠶᠢᠨ ᠠᠷᠠᠰᠦᠨ ᠳᠡᠪᠡᠯ ᠢ ᠬᠡᠯᠡᠨ᠎ᠡ᠃ ᠲᠤᠰ ᠠᠷᠠᠰᠦ ᠪᠠᠷ ᠬᠢᠭᠰᠡᠨ ᠦᠨᠳᠦᠷ ᠦᠰᠦᠲᠡᠢ ᠲᠤᠮᠤ ᠠᠷᠠᠰᠦᠨ ᠨᠡᠬᠡᠢ ᠳᠡᠪᠡᠯ ᠨᠢ ᠲᠤᠩ ᠪᠦᠬᠡ ᠪᠦᠬᠡᠳ ᠤᠨᠴᠠ ᠲᠤᠯᠠᠭᠠᠨ ᠪᠠᠶᠢᠳᠠᠭ᠃ ᠡᠶᠢᠮᠦ ᠠᠴᠠ ︽ᠨᠢᠬᠡ ᠪᠠᠨ ᠦᠵᠡᠵᠦ᠂ ᠨᠡᠬᠡᠢ ᠪᠠᠨ ᠤᠷᠠᠯᠴᠠᠬᠤ︾ ᠬᠡᠳᠡᠭ ᠵᠤᠶᠢᠷ ᠦᠬᠡ ᠭᠠᠷᠤᠭᠰᠠᠨ ᠪᠠᠶᠢᠨ᠎ᠠ᠃ ᠲᠤᠮᠤ ᠡᠷ᠎ᠡ ᠶᠢᠨ ᠨᠡᠬᠡᠢ ᠳᠡᠪᠡᠯ ᠳᠤ ᠶᠢᠰᠦᠨ ᠲᠤᠮᠤ ᠬᠤᠨᠢᠨ ᠠᠷᠠᠰᠦ ᠬᠡᠷᠡᠭᠯᠡᠳᠡᠭ᠃     ᠢᠠᠮᠠᠭᠠᠨ ᠠᠷᠠᠰᠦᠨ ᠳᠠᠬᠤ — ᠡᠪᠦᠯ ᠤᠨ ᠳᠡᠰᠬᠢᠮ᠎ᠡ ᠬᠦᠢᠳᠡᠨ ᠳᠤ ᠠᠳᠤᠭᠤᠨ ᠮᠠᠨᠠᠭᠠᠨ ᠳᠤ ᠨᠡᠬᠡᠢ ᠳᠡᠪᠡᠯ  ᠤᠨ ᠭᠠᠳᠠᠭᠤᠷ ᠳᠠᠪᠬᠤᠷᠯᠠᠵᠦ ᠡᠮᠦᠰᠬᠦ ᠡᠮᠦᠰᠬᠡᠯ᠃ ᠡᠪᠦᠯ ᠤᠨ ᠠᠯᠠᠰᠢᠨ ᠤ ᠦᠶ᠎ᠡ ᠳᠤ ᠭᠠᠷᠭᠠᠭᠰᠠᠨ ᠲᠤᠮᠤ ᠡᠷ᠎ᠡ ᠢᠮᠠᠭᠠᠨ ᠤ ᠦᠨᠳᠦᠷ ᠰᠤᠷ᠂ ᠦᠳᠭᠡᠨ ᠨᠤᠯᠤᠤᠷ ᠲᠠᠢ ᠠᠷᠠᠰᠦ ᠪᠠᠷ ᠬᠢᠭᠰᠡᠨ ᠲᠤᠮᠤ ᠳᠠᠬᠤ ᠳᠡᠪᠡᠯ᠃ ᠲᠤᠮᠤ ᠡᠷ᠎ᠡ  ᠶᠢᠨ ᠳᠠᠬᠤ ᠬᠢᠬᠦ ᠳᠤ ᠪᠠᠷᠤᠭ ᠲᠤᠯᠤᠭᠠᠨ ᠪᠦᠳᠦᠬᠦᠨ ᠡᠷ᠎ᠡ ᠢᠮᠠᠭᠠᠨ ᠤ ᠠᠷᠠᠰᠦ ᠬᠡᠷᠡᠭᠯᠡᠳᠡᠭ᠃     ᠳᠠᠩᠳᠡᠮᠤᠨ ︵ᠳᠡᠰᠮ᠎ᠡ︶ — ᠠᠳᠤᠭᠤ ᠮᠠᠨᠠᠬᠤ᠂ ᠠᠶᠠᠨ ᠵᠢᠩ ᠳᠤ ᠶᠠᠪᠤᠬᠤ ᠳᠤ ᠡᠮᠦᠰᠳᠡᠭ ᠠᠭᠤᠵᠢᠮ ᠡᠯᠪᠡᠭ ᠦᠬᠡᠷ ᠤᠨ ᠠᠷᠠᠰᠦᠨ ᠭᠤᠳᠤᠯ᠂ ᠲᠤᠲᠤᠷ᠎ᠠ ᠨᠢ ᠳᠠᠪᠬᠤᠷ ᠢᠰᠡᠭᠡᠢ ᠤᠶᠢᠮᠦᠰᠦ ᠡᠮᠦᠰᠴᠦ ᠪᠠᠶᠢᠳᠠᠭ᠃    ᠢᠰᠡᠭᠡᠢ ᠭᠤᠳᠤᠯ — ᠡᠪᠦᠳᠦᠭ ᠲᠤᠯᠤᠭᠰᠠᠨ ᠦᠨᠳᠦᠷ ᠲᠦᠷᠡᠢ ᠲᠠᠢ ᠢᠰᠡᠭᠡᠢ ᠭᠤᠳᠤᠯ ᠢ ᠬᠡᠯᠡᠨ᠎ᠡ᠃ ᠪᠠᠰᠠ ᠭᠠᠳᠠ ᠬᠡᠵᠦ ᠬᠡᠯᠡᠳᠡᠭ᠃ ᠤᠯᠠᠩᠬᠢ ᠳᠤ ᠪᠠᠨ ᠮᠤᠷᠢᠨ ᠲᠡᠷᠭᠡᠴᠢᠨ ᠡᠪᠦᠯ ᠳᠡᠭᠡᠨ ᠡᠮᠦᠰᠳᠡᠭ ᠭᠤᠳᠤᠯ᠃     ᠰᠦᠬᠦᠬᠡᠢ ᠭᠤᠳᠤᠯ — ᠬᠠᠪᠤᠷ ᠨᠠᠮᠤᠷ ᠤᠨ ᠰᠡᠷᠢᠬᠦᠨ ᠤᠯᠠᠷᠢᠯ ᠳᠤ ᠡᠮᠦᠰᠳᠡᠭ ᠣᠳᠣᠮᠠᠯ ᠦᠬᠡᠷ ᠤᠨ ᠠᠷᠠᠰᠦ  ᠪᠠᠷ ᠬᠢᠭᠰᠡᠨ ᠭᠤᠳᠤᠯ᠂ ᠬᠦᠩᠬᠡᠨ ᠪᠦᠬᠡᠳ ᠲᠤᠯᠠᠭᠠᠨ ᠪᠠᠶᠢᠳᠠᠭ᠂ ᠲᠤᠲᠤᠷ᠎ᠠ ᠨᠢ ᠢᠰᠡᠭᠡᠢ ᠤᠶᠢᠮᠤᠰᠦ ᠳᠠᠪᠬᠤᠷᠯᠠᠨ ᠡᠮᠦᠰᠦᠨ᠎ᠡ᠃
  
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
᠁
ᠲᠠᠯ᠎ᠠ ᠶᠢᠨ ᠰᠤᠳᠦᠨ ᠡᠵᠢ
ᠡᠭᠡ ᠤᠷᠤᠨ ᠮᠢᠨᠢ
ᠡᠨᠡᠷᠢᠯ ᠤᠨ ᠳᠡᠭᠷᠢ ᠡᠪ ᠬᠠᠮᠲᠦ ᠨᠠᠮ
ᠵᠠᠰᠠᠭᠲᠦ ᠤᠷᠴᠤᠨ ᠤ ᠦᠯᠦᠭᠡᠢ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号